๙ กณฺหชาตกํ

ยโต ยโต ครุ ธุรนฺติ อิทํ สตฺถา เชตวเน วิหรนฺโต ยมกปาฏิหาริยํ อารพฺภ กเถสิ ฯ

ตํ สทฺธึ เทโวโรหเณน เตรสนิปาเต สรภงฺคชาตเก อาวิภวิสฺสติ ฯ สมฺมาสมฺพุทฺเธ ปน ยมกปาฏิหาริยํ กตฺวา เทวโลเก วสิตฺวา มหาปวารณาย สงฺกสฺสนครทฺวาเร โอรุยฺห มหนฺเตน ปริวาเรน เชตวนํ ปวิฏฺเฐ ภิกฺขู ธมฺมสภายํ สนฺนิปติตฺวา อาวุโส ตถาคโต นาม อสมธุโร เตน ตถาคเตน วูฬฺหธุรํ อญฺโญ วหิตุํ สมตฺโถ นาม นตฺถิ ฉ สตฺถาโร มยเมว ปาฏิหาริยํ กริสฺสาม มยเมว ปาฏิหาริยํ กริสฺสามาติ วตฺวา เอกมฺปิ ปาฏิหาริยํ น อกํสุ อโห สตฺถา อสมธุโรติ สตฺถุ คุณกถํ กเถนฺตา นิสีทึสุ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิ ฯ น ภนฺเต อญฺญาย กถาย เอวรูปาย นาม ตุมฺหากเมว คุณกถายาติ ฯ สตฺถา น ภิกฺขเว อิทาเนว มยา วูฬฺหธุรํ โกจิ วหิสฺสติ ปุพฺเพปิ ติรจฺฉานโยนิยํ นิพฺพตฺโตปิ อหํ อตฺตนา สมธุรํ กญฺจิ นาลตฺถนฺติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต โคโยนิยํ ปฏิสนฺธึ คณฺหิ ฯ อถ นํ สามิกา ตรุณวจฺฉกกาเลเยว เอกิสฺสาย มหลฺลิกาย ฆเร วสิตฺวา นิวาสเวตนํ ปริจฺฉินฺทิตฺวา อทํสุ ฯ สา ตํ ยาคุภตฺตาทีหิ ปฏิชคฺคมานา ปุตฺตฏฺฐาเน ฐเปตฺวา วฑฺเฒสิ ฯ โส อยฺยิกากาฬโกเตฺวว ปญฺญายิตฺถ ฯ วยปฺปตฺโต จ อญฺชนวณฺโณ หุตฺวา คามโคเณหิ สทฺธึ จรติ สีลาจารสมฺปนฺโน อโหสิ ฯ คามทารกา สิงฺเคสุปิ กณฺเณสุปิ คเลปิ คเหตฺวา โอลมฺพนฺติ นงฺคุฏฺเฐปิ คเหตฺวา กีฬนฺติ กฑฺฒนฺติ ปิฏฺฐิยํปิ นิสีทนฺติ ฯ โส เอกทิวสํ จินฺเตสิ มยฺหํ มาตา ทุคฺคตา มํ ปุตฺตฏฺฐาเน ฐเปตฺวา ทุกฺเขน โปเสสิ ยนฺนูนาหํ ภตึ กตฺวา อิมํ ทุคฺคตภาวโต โมเจยฺยนฺติ ฯ โส ตโต ปฏฺฐาย ภตึ อุปธาเรนฺโต จรติ ฯ