สุชาตาชาตกํ

กึอณฺฑกา อิเม เทวาติ อิทํ สตฺถา เชตวเน วิหรนฺโต มลฺลิกํ เทวึ อารพฺภ กเถสิ ฯ

เอกทิวสํ กิร รญฺโญ ตาย สทฺธึ สิริวิวาโท อโหสิ ฯ สยนกลโหติปิ วทนฺติเยว ฯ ราชา กุชฺฌิตฺวา ตสฺสา อตฺถิภาวมฺปิ น ชานาติ ฯ มลฺลิกา เทวีปิ สตฺถา รญฺโญ มยิ กุทฺธภาวํ น ชานาติ มญฺเญติ จินฺเตสิ ฯ สตฺถาปิ ญตฺวา อิเมสํ สมคฺคภาวํ กริสฺสามีติ ปุพฺพณฺหสมยํ นิวาเสตฺวา ปตฺตจีวรมาทาย ปญฺจภิกฺขุสตปริวาโร สาวตฺถิยํ ปวิสิตฺวา ราชทฺวารํ อคมาสิ ฯ ราชา ตถาคตสฺส ปตฺตํ คเหตฺวา นิเวสนํ ปเวเสตฺวา ปญฺญตฺตาสเน นิสีทาเปตฺวา พุทฺธปฺปมุขสฺส ภิกฺขุสงฺฆสฺส ทกฺขิโณทกํ ทตฺวา ยาคุขชฺชกํ อาหริ ฯ สตฺถา ปตฺตํ หตฺเถน ปิทหิตฺวา มหาราช กหํ เทวีติ อาห ฯ กึ ภนฺเต ตาย อตฺตโน ยเสน มตฺตายาติ ฯ มหาราช สยเมว ยสํ ทตฺวา มาตุคามํ อุกฺขิปิตฺวา ตาย กตสฺส อปราธสฺส อสหนํ นาม น ยุตฺตนฺติ ฯ ราชา สตฺถุ วจนํ สุตฺวา ตํ ปกฺโกสาเปสิ ฯ สา สตฺถารํ ปริวิสิ ฯ สตฺถา อญฺญมญฺญํ สมคฺเคหิ ภวิตุํ วฏฺฏตีติ สามคฺคีรสวณฺณํ กเถตฺวา ปกฺกามิ ฯ ตโต ปฏฺฐาย อุโภ สมคฺคสํวาสํ วสึสุ ฯ ภิกฺขู ธมฺมสภายํ กถํ สมุฏฺฐาเปสุํ อาวุโส สตฺถา เอกวจเนเนว อุโภ สมคฺเค อกาสีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปาหํ เอเต เอกวาเทเนว สมคฺเค อกาสินฺติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺเสว อตฺถธมฺมานุสาสโก อมจฺโจ อโหสิ ฯ อเถกทิวสํ ราชา มหาวาตปานํ วิวริตฺวา ราชงฺคณํ โอโลกยมาโน อฏฺฐาสิ ฯ ตสฺมึ ขเณ เอกา ปณฺณิกธีตา อภิรูปา ปฐมวเย ฐิตา พทรปจฺฉึ สีเส กตฺวา พทรานิ คณฺหถ พทรานิ คณฺหถาติ วทมานา ราชงฺคเณน คจฺฉติ ฯ ราชา ตสฺสา สทฺทํ สุตฺวา ปฏิพทฺธจิตฺโต หุตฺวา อสฺสามิกภาวํ ญตฺวา ปกฺโกสาเปตฺวา ตํ อคฺคมเหสิฏฺฐาเน ฐเปตฺวา มหนฺตํ ยสํ อทาสิ ฯ สา รญฺโญ ปิยา มนาปา อโหสิ ฯ อเถกทิวสํ ราชา สุวณฺณตฏฺฏเก พทรานิ คเหตฺวา ขาทนฺโต นิสีทิ ฯ สุชาตา เทวี ราชานํ พทรานิ ขาทนฺตํ ทิสฺวา มหาราช กึ นาเมตํ ตุมฺเห ขาทถาติ ปุจฺฉนฺตี ปฐมํ คาถมาห