มตโรทนชาตกํ

มตมตเมว โรทถาติ อิทํ สตฺถา เชตวเน วิหรนฺโต อญฺญตรํ สาวตฺถิยํ กุฏุมฺพิกํ อารพฺภ กเถสิ ฯ

ตสฺส กิร ภาตา กาลมกาสิ ฯ โส ตสฺส กาลกิริยาย โสกาภิภูโต น นฺหายติ น ภุญฺชติ น วิลิมฺปติ ปาโตว สุสานํ คนฺตฺวา โสกปฺปตฺโต โรทติ ฯ สตฺถา ปจฺจูสสมเย โลกํ โวโลเกนฺโต ตสฺส โสตาปตฺติผลุปนิสฺสยํ ทิสฺวา อิมสฺส อตีตํ การณํ อาหริตฺวา โสกํ วูปสเมตฺวา โสตาปตฺติผลํ ทาตุํ วฏฺฏติ ฐเปตฺวา มํ อญฺโญ โกจิ สมตฺโถ นตฺถิ อิมสฺส มยา อวสฺสเยน ภวิตุํ วฏฺฏตีติ ปุนทิวเส ปจฺฉาภตฺตํ ปิณฺฑปาตปฏิกฺกนฺโต ปจฺฉาสมณํ อาทาย ตสฺส ฆรทฺวารํ คนฺตฺวา สตฺถา อาคโตติ สุตฺวา อาสนํ ปญฺญาเปตฺวา ปวิสถาติ กุฏุมฺพิเกน วุตฺโต ปวิสิตฺวา ปญฺญตฺตาสเน นิสีทิ ฯ กุฏุมฺพิโกปิ อาคนฺตฺวา สตฺถารํ วนฺทิตฺวา เอกมนฺตํ นิสีทิ ฯ อถ นํ สตฺถา กึ กุฏุมฺพิก จินฺเตสีติ อาห ฯ อาม ภนฺเต มม ภาตุ มตกาลโต ปฏฺฐาย จินฺเตมีติ ฯ อาวุโส สพฺเพ สงฺขารา อนิจฺจา ภิชฺชิตพฺพยุตฺตกํ ภิชฺชติ ตตฺถ น จินฺเตตพฺพํ โปราณกปณฺฑิตาปิ ภาตริ มเต ภิชฺชิตพฺพยุตฺตกํ ภิชฺชีติ น จินฺตยึสูติ วตฺวา เตน ยาจิโต อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อสีติโกฏิวิภเว เสฏฺฐิกุเล นิพฺพตฺติ ฯ ตสฺส วยปฺปตฺตสฺส มาตาปิตโร กาลมกํสุ ฯ เตสุ กาลกเตสุ โพธิสตฺตสฺส ภาตา กุฏุมฺพํ วิจาเรสิ ฯ โพธิสตฺโต ตํ นิสฺสาย ชีวติ ฯ โส อปรภาเค ตถารูเปน พฺยาธินา กาลมกาสิ ฯ ญาติมิตฺตามจฺจา สนฺนิปติตฺวา พาหา ปคฺคยฺห กนฺทนฺติ โรทนฺติ ฯ เอโกปิ สกภาเวน สณฺฐาตุํ นาสกฺขิ ฯ โพธิสตฺโต ปน เนว กนฺทติ น โรทติ ฯ มนุสฺสา ปสฺสถ โภ อิมสฺส ภาตริ มเต มุขสงฺโกจนมตฺตมฺปิ นตฺถิ อติวิย ถทฺธหทโย เทฺวปิ โกฏฺฐาเส อหเมว ภุญฺชิสฺสามีติ ภาตุ มรณํ อิจฺฉติ มญฺเญติ โพธิสตฺตํ ครหึสุ ฯ ญาตกาปิ นํ ตฺวํ ภาตริ มเต น โรทสีติ ครหึสุเยว ฯ โส เตสํ วจนํ สุตฺวา ตุมฺเห อตฺตโน อนฺธพาลภาเวน อฏฺฐ โลกธมฺเม อชานนฺตา มม ภาตา มโตติ โรทถ อหมฺปิ มริสฺสามิ มมฺปิ อยมฺปิ มริสฺสตีติ กสฺมา น โรทถ ตุมฺเหปิ มริสฺสถ อตฺตานมฺปิ มยมฺปิ มริสฺสาม มริสฺสามาติ กสฺมา น โรทถ สพฺเพ สงฺขารา อนิจฺจา หุตฺวา โหนฺติ เตเนว สภาเวน สณฺฐาตุํ สมตฺโถ เอกสงฺขาโรปิ นตฺถิ ตุมฺเห อนฺธพาลา อญฺญาณตาย อฏฺฐ โลกธมฺเม อชานิตฺวา โรทถ อหํ กิมตฺถํ โรทิสฺสามีติ วตฺวา อิมา คาถา อภาสิ