สุจชชาตกํ

สุจชํ วต น จชีติ อิทํ สตฺถา เชตวเน วิหรนฺโต เอกํ กุฏุมฺพิกํ อารพฺภ กเถสิ ฯ

โส กิร คามเก อุทฺธารํ โสเธสฺสามีติ ๑- ภริยาย สทฺธึ ตตฺถ คนฺตฺวา โสเธตฺวา สกฏํ อาหริตฺวา ปจฺฉา อาเนสฺสามาติ เอกสฺมึ กุเล ฐเปตฺวา ปุน สาวตฺถึ คจฺฉนฺโต อนฺตรามคฺเค เอกํ ปพฺพตํ อทฺทส ฯ อถ นํ ภริยา อาห สเจ สามิ อยํ ปพฺต สุวณฺณมโย ภเวยฺย ทเทยฺยาสิ ปน เม กิญฺจีติ ฯ กาสิ ตฺวํ น กิญฺจิ ทสฺสามีติ ฯ สา จ ถทฺธหทโย วตายํ ปพฺพเต กิร สพฺพสุวณฺณมเย ชาเตปิ มยฺหํ กิญฺจิ น ทสฺสตีติ อนตฺตมนา อโหสิ ฯ เต เชตวนสมีปํ อาคนฺตฺวา ปานียํ ปิวิสฺสามาติ วิหารํ ปวิสิตฺวา ปานียํ ปิวึสุ ฯ สตฺถาปิ ปจฺจูสกาเลเยว เตสํ โสตาปตฺติผลุปนิสฺสยํ ทิสฺวา อาคมนํ โอโลกยมาโน คนฺธกุฏิปริเวเณ นิสีทิ ฉพฺพณฺณพุทฺธรํสิโย โสชฺเชนฺโต ฯ เตปิ ปานียํ ปิวิตฺวา อาคนฺตฺวา สตฺถารํ วนฺทิตฺวา พสีทึสุ ฯ สตฺถา เตหิ สทฺธึ ปฏิสนฺถารํ กตฺวา กหํ คตตฺถาติ ปุจฺฉิ ฯ อมฺหากํ คามเก อุทฺธารํ โสธนตฺถาย ภนฺเตติ ฯ กึ อุปาสิเก ตว สามิโก ตุยฺหํ หิตํ ปฏิกงฺขติ อุปการนฺเต กโรตีติ ฯ ภนฺเต อหํ อิมสฺมึ สสิเนหา อยมฺปิ น มยิ สสิเนโห อชฺช มยา ปพฺพตํ ทิสฺวา สจายํ สุวณฺณมโย ปพฺพโต อสฺส กิญฺจิ เม

ทเทยฺยาสีติ วุตฺเต กาสิ ตฺวํ น กิญฺจิ ทสฺสามีติ อาห เอวํ ถทฺธหทโย อยนฺติ ฯ อุปาสิเก เอวํ นาเมส วทติ ยทา ปน ตํ ตว คุณํ สรติ ตทา สพฺพิสฺสริยํ เทตีติ วตฺวา กเถถ ภนฺเตติ เตหิ ยาจิโต อตีตํ อาหริ ฯ