ปีฐชาตกํ

น เต ปีฐมทายิมฺหาติ อิทํ สตฺถา เชตวเน วิหรนฺโต อญฺญตรํ ภิกฺขุํ อารพฺภ กเถสิ ฯ

โส กิร ชนปทโต เชตวนํ คนฺตฺวา ปตฺตจีวรํ ปฏิสาเมตฺวา สตฺถารํ วนฺทิตฺวา สามเณรทหเร ปุจฺฉิ อาวุโส สาวตฺถิยํ อาคนฺตุกภิกฺขูนํ โก อุปการโกติ ฯ อาวุโส อนาถปิณฺฑิโก นาม มหาเสฏฺฐี วิสาขา นาม มหาอุปาสิกา เอเต ภิกฺขุสงฺฆสฺส อุปการกา มาตาปิตุฏฺฐานิยาติ ฯ โส สาธูติ ปุนทิวเส ปาโตว เอกภิกฺขุสฺสาปิ อปวิฏฺฐกาเล อนาถปิณฺฑิกสฺส ฆรทฺวารํ อคมาสิ ฯ อเวลาย คตตฺตา โกจิ น โอโลเกสิ ฯ โส ตโต กิญฺจิ อลภิตฺวา วิสาขาย ฆรทฺวารํ คโต ฯ ตตฺราปิ อติปาโตว คตตฺตา กิญฺจิ น ลภติ ฯ

โส ตตฺถ ตตฺถ วิจริตฺวา ปุนาคจฺฉนฺโต ยาคุยา นิฏฺฐิตาย คโต ฯ ปุนปิ ตตฺถ ตตฺถ วิจริตฺวา ภตฺเต นิฏฺฐิเต คโต ฯ โส วิหารํ คนฺตฺวา เทฺวปิ กุลานิ อสฺสทฺธานิ อปฺปสนฺนาเนว อิเม ภิกฺขู ปน สทฺธานิ ปสนฺนานีติ กเถนฺตีติ ตานิ กุลานิ ปริภวนฺโต จรติ ฯ อเถกทิวสํ ภิกฺขู ธมฺมสภายํ กถํ สมุฏฺฐาเปสุํ อาวุโส อสุโก กิร ชานปโท ภิกฺขุ อติกาลสฺเสว กุลทฺวารํ คโต ภิกฺขํ อลภนฺโต กุลานิ ปริภวนฺโต จรตีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต ตํ ภิกฺขุํ ปกฺโกสาเปตฺวา สจฺจํ กิราติ ปุจฺฉิตฺวา สจฺจํ ภนฺเตติ วุตฺเต กสฺมา ตฺวํ ภิกฺขุ กุชฺฌสิ ปุพฺเพ อนุปฺปนฺเนปิ พุทฺเธ ตาปสาปิ ตาว กุลทฺวารํ คนฺตฺวา ภิกฺขํ อลภิตฺวา น กุชฺฌึสูติ วตฺวา อตีตํ อาหริ ฯ