อุรคชาตกํ

อุรโคว ตจํ ชิณฺณนฺติ อิทํ สตฺถา เชตวเน วิหรนฺโต มตปุตฺตกํ กุฏุมฺพิกํ อารพฺภ กเถสิ ฯ

วตฺถุ มตภริยามตปิตฺติกวตฺถุสทิสเมว ฯ อิธาปิ สตฺถา ตเถว

ตสฺส นิเวสนํ คนฺตฺวา ตํ อาคตํ วนฺทิตฺวา นิสินฺนํ กึ อาวุโส โสจสีติ ปุจฺฉิตฺวา อาม ภนฺเต ปุตฺตสฺส เม มตกาลโต ปฏฺฐาย โสจามีติ วุตฺเต อาวุโส ภิชฺชนธมฺมํ นาม ภิชฺชติ นสฺสนธมฺมํ นาม นสฺสติ ตญฺจ โข น เอกสฺเสว นาปิ เอกสฺมึเยว คาเม อปริมาเณสุ ปน จกฺกวาเฬสุ ตีสุ ภเวสุ อมรณธมฺโม นาม นตฺถิ ตํภาเวเนว ฐาตุํ สมตฺโถ เอกสงฺขาโรปิ สสฺสโต นาม นตฺถิ สพฺเพ สตฺตา มรณธมฺมา สงฺขารา ภิชฺชนธมฺมา โปราณกปณฺฑิตาปิ ปุตฺเต มเต นสฺสนธมฺมํ นฏฺฐนฺติ น โสจึสูติ วตฺวา เตน ยาจิโต อตีตํ อาหริ ฯ