สุวณฺณมิคชาตกํ

วิกฺกม เร มหามิคาติ อิทํ สตฺถา เชตวเน วิหรนฺโต สาวตฺถิยํ เอกํ กุลธีตรํ อารพฺภ กเถสิ ฯ

สา กิร สาวตฺถิยํ ทฺวินฺนํ อคฺคสาวกานํ อุปฏฺฐากกุลสฺส ธีตา หุตฺวา สทฺธา ปสนฺนา พุทฺธมามกา ธมฺมมามกา สงฺฆมามกา อาจารสมฺปนฺนา ปณฺฑิตา ทานาทิปุญฺญาภิรตา ฯ ตํ อญฺญํ สาวตฺถิยํเยว สมานชาติกํ มิจฺฉาทิฏฺฐิกกุลํ วาเรสิ ฯ อถสฺสา มาตาปิตโร อมฺหากํ ธีตา สทฺธา ปสนฺนา ตีณิ รตนานิ มมายติ ทานาทิปุญฺญาภิรตา ตุมฺเห มิจฺฉาทิฏฺฐิกา อิมิสฺสาปิ ยถารุจิยา ทานํ วา ทาตุํ ธมฺมํ วา โสตุํ วิหารํ วา คนฺตุํ สีลํ วา รกฺขิตุํ อุโปสถกมฺมํ วา กาตุํ น ทสฺสถ น มยํ ตุมฺหากํ เทม อตฺตนา สทิสา มิจฺฉาทิฏฺฐิกกุลาว กุมาริกํ คณฺหถาติ อาหํสุ ฯ เต เตหิ ปฏิกฺขิตฺตา ตุมฺหากํ ธีตา อมฺหากํ ฆรํ คนฺตฺวา ยถาธิปฺปาเยน สพฺพเมตํ กโรตุํ น มยํ วาเรสฺสาม เทถ โน เอตนฺติ วตฺวา เตนหิ คณฺหถาติ วุตฺตา ภทฺทเกน นกฺขตฺเตน มงฺคลํ กตฺวา ตํ อตฺตโน ฆรํ อานยึสุ ฯ สา วตฺตาจารสมฺปนฺนา ปติเทวตา อโหสิ ฯ สสฺสุสสฺสุรสามิกวตฺตานิ กตาเนว โหนฺติ ฯ สา เอกทิวสํ สามิกํ อาห อิจฺฉามหํ อยฺยปุตฺต อมฺหากํ กุลุปกตฺเถรานํ ทานํ ทาตุนฺติ ฯ สาธุ ภทฺเท ยถาอชฺฌาสเยน เทหีติ ฯ สา เถเร นิมนฺตาเปตฺวา มหนฺตํ สกฺการํ กตฺวา ปณีตโภชนํ โภเชตฺวา เอกมนฺตํ นิสีทาเปตฺวา ภนฺเต อิมํ กุลํ มิจฺฉาทิฏฺฐิกํ อสฺสทฺธํ ติณฺณํ รตนานํ คุณํ น ชานาติ สาธุ อยฺยา ยาว อิมํ กุลํ ติณฺณํ รตนานํ คุณํ ชานาติ ตาว อิเธว ภิกฺขํ คณฺหถาติ อาห ฯ เถรา อธิวาเสตฺวา ตตฺถ นิวทฺธํ ภุญฺชนฺติ ฯ ปุน สามิกํ อาห อยฺยปุตฺต เถรา อิธ นิวทฺธํ อาคจฺฉนฺติ กึการณา ตุมฺเห น ปสฺสถาติ ฯ สาธุ ปสฺสิสฺสามีติ ฯ สา ปุนทิวเส เถรานํ ภตฺตกิจฺจปริโยสาเน ตสฺส อาโรเจสิ ฯ โส อุปสงฺกมิตฺวา เถเรหิ สทฺธึ ปฏิสนฺถารํ กตฺวา เอกมนฺตํ นิสีทิ ฯ อถสฺส ธมฺมเสนาปติ ธมฺมกถํ กเถสิ ฯ โส เถรสฺส ธมฺมกถาย เจว อิริยาปเถสุ จ ปสีทิตฺวา ตโต ปฏฺฐาย เถรานํ อาสนํ ปญฺญาเปสิ ปานียํ ปริสฺสาเวติ อนฺตราภตฺเต ธมฺมกถํ สุณาติ ฯ ตสฺส อปรภาเค มิจฺฉาทิฏฺฐิ ภิชฺชิ ฯ อเถกทิวสํ เถโร เตสํ ทฺวินฺนมฺปิ ธมฺมกถํ กเถนฺโต สจฺจานิ ปกาเสสิ ฯ สจฺจปริโยสาเน อุโภปิ โสตาปตฺติผเล ปติฏฺฐหึสุ ฯ ตโต ปฏฺฐาย ตสฺส มาตาปิตโร อาทึ กตฺวา อนฺตมโส ทาสกมฺมกราปิ สพฺเพปิ มิจฺฉาทิฏฺฐึ ภินฺทิตฺวา พุทฺธธมฺมสงฺฆมามกาเยว ชาตา ฯ อเถกทิวสํ สา ทาริกา สามิกํ อาห อยฺยปุตฺต กึ เม ฆราวาเสน อิจฺฉามหํ ปพฺพชิตุนฺติ ฯ โส สาธุ ภทฺเท อหมฺปิ ปพฺพชิสฺสามีติ มหนฺเตน ปริวาเรน ตํ ภิกฺขุนีอุปสฺสยํ เนตฺวา ปพฺพาเชตฺวา สยมฺปิ สตฺถารํ อุปสงฺกมิตฺวา ปพฺพชฺชํ ยาจิ ฯ ตํ สตฺถา ปพฺพาเชสิ อุปสมฺปาเทสิ ฯ เต อุโภปิ วิปสฺสนํ วฑฺเฒตฺวา น จิรสฺเสว อรหตฺตํ ปาปุณึสุ ฯ อเถกทิวสํ ธมฺมสภายํ กถํ สมุฏฺฐาเปสุํ อาวุโส อสุกา นาม ทหรภิกฺขุนี อตฺตโน เจว ปจฺจยา ชาตา สามิกสฺส จ อตฺตนาปิ ปพฺพชิตฺวา อรหตฺตํ ปตฺวา ตมฺปิ ปาเปสีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ตาว เอสา สามิกํ ราคปาสา โมเจสิ ปุพฺเพเปสา โปราณกปณฺฑิเต ปน มรณปาสา โมเจสีติ วตฺวา อตีตํ อาหริ ฯ