สิริกาลกณฺณิชาตกํ

กา นุ กาเลน วณฺเณนาติ อิทํ สตฺถา เชตวเน วิหรนฺโต อนาถปิณฺฑิกํ อารพฺภ กเถสิ ฯ

โส หิ โสตาปตฺติผเล ปติฏฺฐิตกาลโต ปฏฺฐาย อขณฺฑานิ ปญฺจ สีลานิ รกฺขติ ฯ ภริยาปิสฺส ปุตฺตธีตโรปิ ทาสาปิ ภตึ คเหตฺวา กมฺมํ กโรนฺตา กมฺมกราปิ สพฺเพ รกฺขึสุเยว ฯ อเถกทิวสํ ภิกฺขู ธมฺมสภายํ กถํ สมุฏฺฐาเปสุํ อาวุโส อนาถปิณฺฑิโก สุจิ เจว สุจิปริวาโร จ หุตฺวา จรตีติ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปิ โปราณกปณฺฑิตาปิ สุจิ เจว สุจิปริวารา จ อเหสุนฺติ วตฺวา เตหิ ยาจิโต อตีตํ อาหร

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต เสฏฺฐี หุตฺวา ทานํ อทาสิ สีลํ รกฺขิ อุโปสถกมฺมํ กริ ภริยาปิสฺส ปญฺจ สีลานิ รกฺขติ ปุตฺตธีตโรปิ ทาสกมฺมกรโปริสาปิ รกฺขนฺติ ฯ โส สุจิปริวารเสฏฺฐีเตฺวว ปญฺญายิตฺถ ฯ อเถกทิวสํ โส จินฺเตสิ สเจ มยา สุจิปริวารสีโล โกจิ อาคมิสฺสติ ตสฺส มม นิสีทนปลฺลงฺกํ วา นิปชฺชนสยนํ วา ทาตุํ น ยุตฺตํ อนุจฺฉิฏฺฐํ อปริภุตฺตํ ทาตุํ วฏฺฏตีติ ฯ อถ อตฺตโน อุปฏฺฐาเนเยว เอกปสฺเสน อปริภุตฺตํ ปลฺลงฺกญฺจ สยนญฺจ ปญฺญาเปสิ ฯ ตสฺมึ สมเย จาตุมฺมหาราชิกเทวโลเก วิรูปกฺขมหาราชสฺส ธีตา กาลกณฺณี จ นาม ธตรฏฺฐมหาราชสฺส ธีตา สิรี จ นามาติ อิมา เทฺว พหุํ คนฺธมาลํ อาทาย อโนตตฺเต กีฬิสฺสามาติ อโนตตฺตติตฺถํ อาคจฺฉึสุ ฯ ตสฺมึ ปน อโนตตฺตทเห พหูนิ ติตฺถานิ เตสุ พุทฺธานํ ติตฺเถ พุทฺธาว นหายนฺติ ปจฺเจกพุทฺธานํ ติตฺเถ ปจฺเจกพุทฺธาว นหายนฺติ ภกฺขูนํ ติตฺเถ ภิกฺขูว นหายนฺติ ตาปสานํ ติตฺเถ ตาปสาว นหายนฺติ จาตุมฺมหาราชิกาทีสุ ฉสุ สคฺเคสุ เทวปุตฺตานํ ติตฺเถ เทวปุตฺตาว นหายนฺติ เทวธีตานํ ติตฺเถ เทวธีตาว นหายนฺติ ฯ ตตฺรีมา เทฺว คนฺตฺวา อหํ ปฐมํ นหายิสฺสามิ อหํ ปฐมนฺติ ติตฺถตฺถาย กลหํ กรึสุ ฯ กาลกณฺณี อหํ โลกํ ปาเลมิ วิจาเรมิ ตสฺมา ปฐมํ นหายิตุํ ยุตฺตมฺหีติ วทติ ฯ สิรี อหํ มหาราชสฺส อิสฺสริยทายิกาย สมฺมาปฏิปทาย ฐิตา ตสฺมา ปฐมํ นหายิตุํ ยุตฺตมฺหีติ วทติ ฯ ตา อมฺเหสุ กํ ปฐมํ นหายิตุํ ยุตฺตรูปํ วา อยุตฺตรูปํ วา จตฺตาโร มหาราชา ชานิสฺสนฺตีติ เตสํ สนฺติกํ คนฺตฺวา อมฺเหสุ กา ปฐมํ อโนตตฺตทเห นหายิตุํ ยุตฺตรูปาติ ปุจฺฉึสุ ฯ ธตรฏฺฐวิรูปกฺขา น สกฺกา อมฺเหหิ วินิจฺฉิตุนฺติ วิรุฬฺหกเวสฺสวณานํ ภารมกํสุ ฯ เต อมฺเหปิ วินิจฺฉิตุํ น สกฺขิสฺสาม สกฺกสฺส ปาทมูลเมว เปสิสฺสามาติ ตา สกฺกสฺส สนฺติกํ เปเสสุํ ฯ สกฺโก ตาสํ วจนํ สุตฺวา จินฺเตสิ อิมา เทฺวปิ มม ปริสานญฺเญว ธีตโร น สกฺกา มยา อิมํ อฏฺฏํ วินิจฺฉิตุนฺติ ฯ อถ สกฺโก อาห พาราณสิยํ สุจิปริวาโร นาม เสฏฺฐี อตฺถิ ตสฺส ฆเร อนุจฺฉิฏฺฐาสนญฺเจว อนุจฺฉิฏฺฐสยนญฺจ ปญฺญตฺตํ ยา ตตฺถ นิสีทิตุํ วา สยิตุํ วา ลภติ สา ปฐมํ นหายิตุํ ยุตฺตรูปาติ ฯ ตํ สุตฺวา กาลกณฺณี ตํขณญฺเญว นีลวตฺถํ นิวาเสตฺวา นีลวิเลปนํ วิลิมฺปิตฺวา นีลมณิปิลนฺธนํ ปิลนฺธิตฺวา ยนฺตปาสาโณ วิย เทวโลกโต โอตริตฺวา มชฺฌิมยามสมนนฺตรเมว เสฏฺฐิโน ปาสาทสฺส อุปฏฺฐานทฺวาเร สยนสฺส อวิทูเร ฐาเน นีลรํสึ วิสฺสชฺเชตฺวา อากาเส อฏฺฐาสิ ฯ เสฏฺฐี โอโลเกตฺวา นํ อทฺทส สห ทสฺสเนเนวสฺส อปฺปิยา อโหสิ อมนาปา ฯ โส ตาย สทฺธึ สลฺลปนฺโต ปฐมํ คาถมาห