๗ ติตฺติรชาตกํ

เย วุฑฺฒมปจายนฺตีติ อิทํ สตฺถา สาวตฺถึ คจฺฉนฺโต สารีปุตฺตตฺเถรสฺส เสนาสนปฏิพาหนํ อารพฺภ กเถสิ ฯ

อนาถปิณฺฑิเกน หิ วิหารํ กาเรตฺวา ทูเต เปสิเต สตฺถา ราชคหา นิกฺขมฺม เวสาลึ ปตฺวา ตตฺถ ยถาภิรนฺตํ วิหริตฺวา สาวตฺถึ คมิสฺสามีติ มคฺคํ ปฏิปชฺชิ ฯ เตน สมเยน ฉพฺพคฺคิยานํ อนฺเตวาสิกา ปุรโต ปุรโต คนฺตฺวา เถรานํ เสนาสเนสุ อคหิเตเสฺวว อิทํ เสนาสนํ อมฺหากํ อุปชฺฌายสฺส อิทํ เสนาสนํ อาจริยสฺส อิทํ อมฺหากเมว ภวิสฺสตีติ เสนาสนานิ ปลิพุทฺธนฺติ ฯ ปจฺฉา อาคตา เถรา เสนาสนานิ น ลภนฺติ ฯ สารีปุตฺตตฺเถรสฺสาปิ อนฺเตวาสิกา เถรสฺส เสนาสนํ ปริเยสนฺตา น ลภึสุ ฯ เถโร เสนาสนํ อลภนฺโต สตฺถุ เสนาสนสฺเสว อวิทูเร เอกสฺมึ รุกฺขมูเล นิสชฺชาย จ จงฺกเมน จ วีตินาเมสิ ฯ สตฺถา ปจฺจูสสมเย นิกฺขมิตฺวา อุกฺกาสิ ฯ เถโรปิ อุกฺกาสิ ฯ โก เอโสติ ฯ อหํ ภนฺเต สารีปุตฺโตติ ฯ สารีปุตฺต อิมาย เวลาย อิธ กึ กโรสีติ ฯ โส ตํ ปวุตฺตึ อาโรเจสิ ฯ สตฺถุ เถรสฺส วจนํ สุตฺวา อิทานิ ตาว มยิ ชีวนฺเตเยว ภิกฺขู อญฺญมญฺญํ อคารวา อปฺปติสฺสา ปรินิพฺพุเต กึ นุ โข กริสฺสนฺตีติ อาวชฺเชนฺตสฺส ธมฺมสํเวโค อุทปาทิ ฯ โส ปภาตาย รตฺติยา ภิกฺขุสงฺฆํ สนฺนิปาตาเปตฺวา ภิกฺขู ปฏิปุจฺฉิ สจฺจํ กิร ภิกฺขเว ฉพฺพคฺคิยา ปุรโต ปุรโต คนฺตฺวา เถรานํ ภิกฺขูนํ เสนาสนํ ปฏิพาหนฺตีติ ฯ สจฺจํ ภควาติ ฯ ตโต ฉพฺพํคฺคิเย ครหิตฺวา ธมฺมกถํ กตฺวา ภิกฺขู อามนฺเตสิ โก นุ โข ภิกฺขเว อคฺคาสนํ อคฺโคทกํ อคฺคปิณฺฑํ อรหตีติ ฯ เอกจฺเจ ภิกฺขู ขตฺติยกุลา ปพฺพชิโตติ อาหํสุ เอกจฺเจ พฺราหฺมณกุลา เอกจฺเจ คหปติกุลา ปพฺพชิโตติ ฯ อปเร วินยธโร ธมฺมกถิโก ปฐมสฺส ฌานสฺส ลาภี ทุติยสฺส ตติยสฺส จตุตฺถสฺส ฌานสฺส ลาภีติ ฯ อปเร โสตาปนฺโน สกทาคามี อนาคามี อรหา เตวิชฺโช ฉฬภิญฺโญติ อาหํสุ ฯ เอวํ เตหิ ภิกฺขูหิ อตฺตโน รุจิตวเสน อคฺคาสนาทิรหานํ กถิตกาเล สตฺถา อาห น ภิกฺขเว มยฺหํ สาสเน อคฺคาสนาทีนิ ปตฺวา ขตฺติยกุลา ปพฺพชิโต ปมาณํ น พฺราหฺมณกุลา น คหปติกุลา ปพฺพชิโต น วินยธโร น สุตฺตนฺติโก นาภิธมฺมิโก น ปฐมฌานาทิลาภิโน น โสตาปนฺนาทโย ปมาณํ อถ โข ภิกฺขเว อิมสฺมึ สาสเน ยถาวุฑฺฒํ อภิวาทนํ ปจฺจุฏฺฐานํ อญฺชลิกมฺมํ สามีจิกมฺมํ กาตพฺพํ อคฺคาสนํ อคฺโคทกํ อคฺคปิณฺฑํ ลทฺธพฺพํ อิทเมตฺถ ปมาณํ ตสฺมา วุฑฺฒตโร ภิกฺขุ เอเตสํ อนุจฺฉวิโก อิทานิ โข ปน ภิกฺขเว สารีปุตฺโต มยฺหํ อคฺคสาวโก อนุธมฺมจกฺกปฺปวตฺตโก มม อนนฺตรํ เสนาสนํ ลทฺธุํ อรหติ โส อิมํ รตฺตึ เสนาสนํ อลภนฺโต รุกฺขมูเล วีตินาเมสิ ตุมฺเห อิทาเนว เอวํ อคารวา อปฺปติสฺสา อสภาควุตฺติโน คจฺฉนฺเต คจฺฉนฺเต กาเล กินฺติ กตฺวา วิหริสฺสถาติ ฯ อถ เนสํ โอวาททานตฺถาย ปุพฺเพ ภิกฺขเว ติรจฺฉานคตาปิ น โข ปเนตํ อมหากํ ปฏิรูปํ ยํ มยํ อญฺญมญฺญํ อคารวา อปฺปติสฺสา อสภาควุตฺติโน วิหเรยฺยาม อมฺเหสุ มหลฺลกตรํ ชานิตฺวา ตสฺส อภิวาทนาทีนิ กริสฺสามาติ สาธุกํ วีมํสิตฺวา อยนฺโน มหลฺลโกติ ญตฺวา ตสฺส อภิวาทนาทีนิ กตฺวา เทวปถํ ปูรยมานา คตาติ วตฺวา อตีตํ อาหริ ฯ