สูจิชาตกํ

อกกฺกสนฺติ อิทํ สตฺถา เชตวเน วิหรนฺโต ปญฺญาปารมึ อารพฺภ กเถสิ ฯ วตฺถุํ มหาอุมฺมงฺคชาตเก อาวีภวิสฺสติ ฯ

ตทา ปน สตฺถา ภิกฺขู อามนฺเตตฺวา น ภิกฺขเว อิทาเนว ปุพฺเพปิ ตถาคโต ปญฺญวา อุปายกุสโลเยวาติ วตฺวา อตีตํ อาหริ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต กาสิกรฏฺเฐ กมฺมารกุเล นิพฺพตฺติตฺวา วยปฺปตฺโต ปริโยทาตสิปฺโป อโหสิ ฯ มาตาปิตโร ปนสฺส ทลิทฺทา ฯ เตสํ คามโต อวิทูเร อญฺโญ สหสฺสกุฏิโก กมฺมารคาโม ตตฺถ กมฺมารสหสฺสเชฏฺฐโก กมฺมาโร ราชวลฺลโภ อฑฺโฒ มหทฺธโน ฯ ตสฺเสกา ธีตา อโหสิ อุตฺตมรูปธรา เทวจฺฉรปฏิภาคา ชนปทกลฺยาณี ลกฺขเณหิ สมนฺนาคตา ฯ สามนฺตคาเมสุ มนุสฺสา วาสีผรสุผาลปาจนาทิการาปนตฺถาย ตํ คามํ คนฺตฺวา เยภุยฺเยน ตํ กุมาริกํ ปสฺสนฺติ ฯ เต อตฺตโน อตฺตโน คามํ คนฺตฺวา นิสินฺนฏฺฐานาทีสุ ตสฺสา รูปํ วณฺเณนฺติ ฯ โพธิสตฺโต ตํ สุตฺวา สวนสํสคฺเคน พชฺฌิตฺวา ปาทปริจาริกํ นํ กริสฺสามีติ อุตฺตมชาติกํ อยํ คเหตฺวา เอกํ สุขุมํ ฆรสูจึ กตฺวา ปาเส วิชฺฌิตฺวา อุทเก อุปลาเปตฺวา อปรํปิ ตถารูปเมว ตสฺสา โกสกํ กตฺวา ปาเส วิชฺฌิตฺวา อิมินา นิยาเมน ตสฺสา สตฺต โกสเก อกาสิ ฯ กถํ อกาสีติ น วตฺตพฺพํ ฯ โพธิสตฺตานญฺหิ ญาณมหนฺตตาย การณํ อิชฺฌติ ฯ โส ตํ สูจึ นาฬิกาย ปกฺขิปิตฺวา โอวฏฺฏิกาย กตฺวา ตํ คามํ คนฺตฺวา กมฺมารเชฏฺฐกสฺส วสนวีถึ ปุจฺฉิตฺวา ตตฺถ คนฺตฺวา ทฺวาเร ฐตฺวา โก มม หตฺถโต เอวรูปํ นาม สูจึ มูเลน กีณิตุํ อิจฺฉตีติ สูจึ วณฺเณนฺโต เชฏฺฐกกมฺมารสฺส ฆรทฺวารสมีเป ฐตฺวา ปฐมํ คาถมาห