๘ พกชาตกํ

นาจฺจนฺตํ นิกติปฺปญฺโญติ อิทํ สตฺถา เชตวเน วิหรนฺโต จีวรวฑฺฒกํ ภิกฺขุํ อารพฺภ กเถสิ ฯ

เอโก กิร เชตวนวาสิโก ภิกฺขุ ยงฺกิญฺจิ จีวเร กตฺตพฺพํ เฉทนฆฏนวิจารณสิพฺพนาทิกํ กมฺมํ ตตฺถ สุกุสโล โส ตาย กุสลตาย จีวรํ วฑฺเฒติ ตสฺมา จีวรวฑฺฒโกเตฺวว ปญฺญายิตฺถ ฯ กึ ปเนส กโรตีติ ฯ ชิณฺณปิโลติกาย หตฺถกมฺมํ ทสฺเสตฺวา สุผุสิตํ มนาปํ จีวรํ กตฺวา รชนปริโยสาเน ปิฏฺโฐทเกน รชิตฺวา สงฺเขน ฆเฏตฺวา อุชฺชลํ มนุญฺญํ กตฺวา นิกฺขิปติ ฯ จีวรกมฺมํ กาตุํ อชานนฺตา ภิกฺขู อหเต สาฏเก คเหตฺวา ตสฺส สนฺติกํ คนฺตฺวา มยํ จีวรํ กาตุํ น ชานาม จีวรํ โน กตฺวา เทถาติ วทนฺติ ฯ โส จีวรํ อาวุโส กยิรมานํ จิเรน นิฏฺฐาติ มยา กตํ จีวรเมว อตฺถิ อิเม สาฏเก ฐเปตฺวา ตํ คณฺหิตฺวา คจฺฉถาติ นีหริตฺวา ทสฺเสติ ฯ เต ตสฺส วณฺณสมฺปตฺตึเยว ทิสฺวา อนฺตรํ อชานนฺตา ถิรนฺติ สญฺญาย อหตสาฏเก จีวรวฑฺฒกสฺส ทตฺวา ตํ คณฺหิตฺวา คจฺฉนฺติ ฯ ตํ เตหิ โถกํ กิลิฏฺฐกาเล อุณฺโหทเกน โธวิยมานํ อตฺตโน ปกตึ ทสฺเสติ ฯ ตตฺถ ตตฺถ ชิณฺณฏฺฐานํ ปญฺญายติ ฯ เต วิปฺปฏิสาริโน โหนฺติ ฯ เอวํ อาคตาคเต ปิโลติกาหิ วญฺเจนฺโต โส ภิกฺขุ สพฺพตฺถ ปากโฏ ชาโต ฯ ยถา เจส เชตวเน ตถา อญฺญตรสฺมึ คามเกปิ เอโก จีวรวฑฺฒโก โลกํ วญฺเจติ ฯ ตสฺส สมฺภตฺตา ภิกฺขู ภนฺเต เชตวเน กิร เอโก จีวรวฑฺฒโก เอวํ โลกํ วญฺเจตีติ อาโรจยึสุ ฯ อถสฺส เอตโหสิ หนฺทาหํ ตํ นครวาสิกํ วญฺเจมีติ ปิโลติกํ จีวรํ อติมนาปํ กตฺวา สุรตฺตํ รชิตฺวา ตํ ปารุปิตฺวา เชตวนํ อคมาสิ ฯ อิตโร ตํ ทิสฺวาว โลภํ อุปฺปาเทตฺวา ภนฺเต อิทํ จีวรํ ตุมฺเหหิ กตนฺติ ปุจฺฉิ ฯ อาม อาวุโสติ ฯ ภนฺเต อิมํ จีวรํ มยฺหํ เทถ ตุมฺเห อญฺญํ ลภิสฺสถาติ ฯ อาวุโส มยํ คามวาสิกา ทุลฺลภปจฺจยา อิมาหํ ตุยฺหํ ทตฺวา อตฺตนา กึ ปารุปิสฺสามีติ ฯ ภนฺเต มม สนฺติเก อหตสาฏกา อตฺถิ เต คเหตฺวา ตุมฺหากํ จีวรํ กโรถาติ ฯ อาวุโส มยา เอตฺถ หตฺถกมฺมํ ทสฺสิตํ ตยิ ปน เอวํ วทนฺเต กึ สกฺกา กาตุํ คณฺหถ นนฺติ ตสฺส ปิโลติกจีวรํ ทตฺวา อหตสาฏเก อาทาย ตํ วญฺเจตฺวา ปกฺกามิ ฯ เชตวนวาสิโกปิ ตํ จีวรํ ปารุปิตฺวา กติปาหจฺจเยน อุณฺโหทเกน โธวนฺโต ชิณฺณปิโลติกภาวํ ทิสฺวา ลชฺชิโต ฯ คามวาสินา จีวรวฑฺฒเกน กิร เชตวนวาสิโก วญฺจิโตติ ตสฺส วญฺจิตภาโว สงฺฆมชฺเฌ ปากโฏ ชาโต ฯ อเถกทิวสํ ภิกฺขู ธมฺมสภายํ ตํ กถํ กเถนฺตา นิสีทึสุ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิ ฯ เต ตมตฺถํ อาโรจยึสุ ฯ สตฺถา น ภิกฺขเว เชตวนวาสี จีวรวฑฺฒโก อิทาเนว อญฺเญ วญฺเจติ ปุพฺเพปิ วญฺเจสิเยว คามวาสิเกนาปิ น อิทาเนว เอส เชตวนวาสิโก จีวรวฑฺฒโก วญฺจิโต ปุพฺเพปิ วญฺจิโตเยวาติ วตฺวา อตีตํ อาหริ ฯ