โสมทตฺตชาตกํ

โย มํ ปุเร ปจฺจุเทตีติ อิทํ สตฺถา เชตวเน วิหรนฺโต อญฺญตรํ มหลฺลกํ อารพฺภ กเถสิ ฯ

โส กิเรกํ สามเณรํ ปพฺพาเชสิ ฯ โส สามเณโร ตสฺส อุปการโก หุตฺวา ตถารูเปน โรเคน กาลมกาสิ ฯ มหลฺลโก ตสฺมึ กาลกเต โรทนฺโต ปริเทวนฺโต วิจรติ ฯ ตํ ทิสฺวา ภิกฺขู ธมฺมสภายํ กถํ สมุฏฺฐาเปสุํ อาวุโส อสุกมหลฺลโก สามเณรสฺส กาลกตกิริยาย โรทนฺโต ปริเทวนฺโต วิจรติ มรณานุสฺสติกมฺมฏฺฐาน- รหิโต มญฺเญติ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพเปส เอตสฺมึ มเต โรทติเยวาติ วตฺวา เตหิ ยาจิโต อตีตํ อาหริ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต สกฺกตฺตํ กาเรสิ ฯ อเถโก กาสินิคมวาสี พฺราหฺมณมหาสาโล กาเม ปหาย หิมวนฺตํ ปวิสิตฺวา อิสิปพฺพชฺชํ ปพฺพชิตฺวา อุญฺฉาจริยาย วนมูลผลาหาโร วสิ ฯ เอกทิวสํ ผลาผลตฺถาย คโต เอกํ หตฺถิฉาปํ ทิสฺวา อตฺตโน อสฺสมปทํ เนตฺวา ปุตฺตฏฺฐาเน ฐเปตฺวา โสมทตฺโตติสฺส นามํ กตฺวา ติณปณฺณาทีนิ ขาทาเปนฺโต ปฏิชคฺคิ ฯ โส วยปฺปตฺโต มหาสรีโร หุตฺวา เอกทิวสํ พหุโคจรํ คเหตฺวา อชีรเกน ทุพฺพโล อโหสิ ฯ ตาปโส ตํ อสฺสมปเท กตฺวา ผลาผลตฺถาย คโต ฯ ตสฺมึ อนาคเตเยว หตฺถิโปตโก กาลมกาสิ ฯ ตาปโส ผลาผลํ คเหตฺวา อาคจฺฉนฺโต อญฺเญสุ ทิวเสสุ เม ปุตฺโต ปจฺจุคฺคมนํ กโรติ อชฺช น ทิสฺสติ กหํ นุ โข คโตติ ปริเทวนฺโต ปฐมํ คาถมาห