นวกนิปาตชาตกฏฺฐกถา

คิชฺฌชาตกํ

ปริสงฺกุปโถ นามาติ อิทํ สตฺถา เชตวเน วิหรนฺโต เอกํ ทุพฺพจํ ภิกฺขุํ อารพฺภ กเถสิ ฯ

โส กิร เอโก กุลปุตฺโต นิยฺยานิกสาสเน ปพฺพชิตฺวาปิ อตฺถกาเมหิ อาจริยุปชฺฌาเยหิ เจว สพฺรหฺมจารีหิ จ เอวนฺเต อภิกฺกมิตพฺพํ เอวํ ปฏิกฺกมิตพฺพํ เอวํ อาโลเกตพฺพํ เอวํ วิโลเกตพฺพํ เอวํ สมฺมิญฺชิตพฺพํ เอวํ ปสาเรตพฺพํ เอวํ นิวาเสตพฺพํ เอวํ ปารุปิตพฺพํ เอวํ ปตฺโต คเหตพฺโพ ยาปนมตฺตํ ภตฺตํ คเหตฺวา ปจฺจเวกฺขิตฺวาว ปริภุญฺชิตพฺพํ อินฺทฺริเยสุ คุตฺตทฺวาเรน โภชเน มตฺตญฺญุนา ชาคริยมนุยุตฺเตน ภวิตพฺพํ อิทํ อาคนฺตุกวตฺตํ นาม ชานิตพฺพํ อิทํ คมิกวตฺตํ นาม อิมานิ จุทฺทส ขนฺธกวตฺตานิ อสีติ มหาวตฺตานิ ตตฺถ เต สมฺมา วตฺติตพฺพํ อิเม เตรส ธุตงฺคคุณา นาม เอเต สมาทาย วตฺติตพฺพนฺติ โอวทิยมาโน ทุพฺพโจ อโหสิ อกฺขโม อปฺปทกฺขิณคฺคาหี อนุสาสนึ อหํ ตุมฺเห น วทามิ ตุมฺเห มํ กสฺมา วเทถ อหเมว อตฺตโน อตฺถํ วา อนตฺถํ วา กริสฺสามีติ อตฺตานํ อวจนียํ อกาสิ ฯ อถสฺส ทุพฺพจภาวํ ญตฺวา ภิกฺขู ธมฺมสภายํ อคุณกถํ กเถนฺตา นิสีทึสุ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต ตํ ภิกฺขุํ ปกฺโกสาเปตฺวา สจฺจํ กิร ตฺวํ ทุพฺพโจสีติ ปุจฺฉิตฺวา สจฺจนฺติ วุตฺเต กสฺมา ภิกฺขุ เอวรูเป นิยฺยานิกสาสเน ปพฺพชิตฺวา อตฺถกามานํ วจนํ น กโรสิ ปุพฺเพปิ ตฺวํ วจนํ อกตฺวา เวรพฺภวาตมุเข จุณฺณวิจุณฺโณ ชาโตติ วตฺวา อตีตํ อาหริ