กุกฺกุฏชาตกํ

นาสฺมเส กตปาปมฺหีติ อิทํ สตฺถา เวฬุวเน วิหรนฺโต วธาย ปริสกฺกนํ อารพฺภ กเถสิ ฯ

ธมฺมสภายมฺหิ ภิกฺขู เทวทตฺตสฺส อคุณกถํ สมุฏฺฐาเปสุํ อาวุโส เทวทตฺโต ธนุคฺคหาทิปโยชเนน ทสพลสฺส วธตฺถเมว อุปายํ กโรตีติ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพเปส มยฺหํ วธาย ปริสกฺกติเยวาติ วตฺวา อตีตํ อาหริ

อตีเต โกสมฺพิยํ โกสมฺพิโก นาม ราชา รชฺชํ กาเรสิ ฯ ตทา โพธิสตฺโต เอกสฺมึ เวฬุวเน กุกฺกุฏโยนิยํ นิพฺพตฺติตฺวา อเนกสตกุกฺกุฏปริวาโร อรญฺเญ วสติ ฯ ตสฺสาวิทูเร เอโก เสโน วสติ ฯ โส อุปาเยน เอเกกํ กุกฺกุฏํ คเหตฺวา ขาทนฺโต ฐเปตฺวา โพธิสตฺตํ เสเส ขาทิ ฯ โพธิสตฺโต เอกโกว อโหสิ ฯ โส อปฺปมตฺโต เวลาย โคจรํ คเหตฺวา เวฬุคฺคหนํ ปวิสิตฺวา วสติ ฯ โส เสโน ตํ คณฺหิตุํ อสกฺโกนฺโต เอเกน นํ อุปาเยน อุปลาเปตฺวา คณฺหิสฺสามีติ จินฺเตตฺวา ตสฺสาวิทูเร สาขาย นิลียิตฺวา สมฺม กุกฺกุฏราช ตฺวํ มยฺหํ กสฺมา ภายสิ อหํ ตยา สทฺธึ วิสฺสาสํ กาตุกาโม อสุโก นาม ปเทโส สมฺปนฺนโคจโร ตตฺถ อุโภปิ โคจรํ คเหตฺวา อญฺญมญฺญํ ปิยสํวาสํ วสิสฺสามาติ อาห ฯ อถ นํ โพธิสตฺโต อาห สมฺม มยฺหํ ตยา สทฺธึ วิสฺสาโส นาม นตฺถิ คจฺฉ ตฺวนฺติ ฯ สมฺม ตฺวํ มยฺหํ ปุพฺเพ กตปาปตาย น สทฺทหสิ อิโต ปฏฺฐาย เอวรูปํ น กริสฺสามีติ ฯ น จ มยฺหํ ตาทิเสน สหาเยน อตฺโถ คจฺเฉว ตฺวนฺติ ฯ อิติ นํ ยาวตติยํ ปฏิกฺขิปิตฺวา เอตฺตเกหิ องฺเคหิ สมนฺนาคเตน ปุคฺคเลน สทฺธึ วิสฺสาโส นาม กาตุํ น วฏฺฏตีติ วนฆฏํ อุนฺนาเทนฺโต เทวตาสุ สาธุการํ ททมานาสุ ธมฺมกถํ สมุฏฐเปนฺโต อิมา คาถาโย อชฺฌภาสิ