มหามงฺคลชาตกํ

กึสุ นโรติ อิทํ สตฺถา เชตวเน วิหรนฺโต มหามงฺคลสุตฺตํ อารพฺภ กเถสิ ฯ

ราชคหนครสฺมึ หิ เกนจิเทว กรณีเยน สณฺฐาคาเร สนฺนิปติตสฺส มหาชนสฺส มชฺเฌ เอโก ปุริโส อชฺช เม มงฺคลกิริยา อตฺถีติ อุฏฺฐาย อคมาสิ ฯ อปโร ตสฺส สุตฺวา อยํ มงฺคลนฺติ วตฺวาว คโต กึ เอตํ มงฺคลนฺนามาติ อาห ฯ ตมญฺโญ อภิมงฺคลรูปทสฺสนํ มงฺคลนฺนาม เอกจฺโจ หิ กาลสฺเสว อุฏฺฐาย สพฺพเสตํ อุสภํ วา สยนฺตํ คพฺภินิตฺถึ วา โรหิตมจฺฉํ วา ปุณฺณฆฏํ วา นวณีตํ วา โคสปฺปึ วา อาหตวตฺถํ วา ปายาสํ วา ปสฺสติ อิโต อุตฺตรึ มงฺคลํ นาม นตฺถีติ อาห ฯ เตน กถิตํปิ เอกจฺเจ สุกถิตนฺติ อภินนฺทึสุ ฯ อปโร น เอตํ มงฺคลํ สุตมงฺคลํ นาม มงฺคลํ เอกจฺโจ ปุณฺณาติ วทนฺตานํ สุณาติ ตถา วฑฺฒมานาติ สุขนฺติ ภุญฺชาติ ขาทาติ วทนฺตานํ สุณาติ ตโต อุตฺตรึ มงฺคลํ นาม นตฺถีติ อาห ฯ เตนปิ กถิตํ เอกจฺเจ สุกถิตนฺติ อภินนฺทึสุ ฯ อปโร น เอตํ มงฺคล มุตมงฺคลํ นาม มงฺคลํ เอกจฺโจ หิ กาลสฺเสว อุฏฺฐาย ปฐวึ อามสติ หริตติณํ อลฺลโคมยํ ปริสุทฺธสาฏกํ โรหิตมจฺฉํ สุวณฺณรชตํ โภชนํ อามสติ อิโต อุตฺตรึ มงฺคลํ นาม นตฺถีติ อาห ฯ เตนปิ กถิตํ เอกจฺเจ สุกถิตนฺติ อภินนฺทึสุ ฯ เอวํ ทิฏฺฐมงฺคลิกา สุตมงฺคลิกา มุตมงฺคลิกาติ ตโย วิสทิสา หุตฺวา อญฺญมญฺญํ สญฺญาเปตุํ นาสกฺขึสุ ฯ ภุมฺมเทวตา อาทึ กตฺวา ยาว พฺรหฺมโลกา อิทํ มงฺคลนฺติ ตถโต น ชานึสุ ฯ สกฺโก จินฺเตสิ อิมํ มงฺคลปญฺหํ สเทวเก โลเก อญฺญตฺร ภควตา อญฺโญ กเถตุํ สมตฺโถ นาม นตฺถิ ภควนฺตํ อุปสงฺกมิตฺวา อิมํ ปญฺหํ ปุจฺฉิสฺสามีติ โส รตฺติภาเค สตฺถารํ อุปสงฺกมิตฺวา วนฺทิตฺวา อญฺชลึ ปคฺคยฺห พหู เทวา มนุสฺสา จาติ ปญฺหํ ปุจฺฉิ ฯ อถสฺส สตฺถา ทฺวาทสหิ คาถาหิ อฏฺฐตึส มหามงฺคลานิ กเถสิ ฯ มงฺคลสุตฺเต วินิวตฺตนฺเต โกฏิสตสหสฺสมตฺตา เทวตา อรหตฺตํ ปาปุณึสุ โสตาปนฺนาทีนํ คณนปโถ นตฺถิ ฯ สกฺโก มงฺคลํ สุตฺวา สกฏฺฐานเมว คโต ฯ สตฺถารา มงฺคเล กถิเต สเทวโก โลโก สุกถิตนฺติ อภินนฺทิ ฯ ตทา ธมฺมสภายํ ตถาคตสฺส คุณกถํ สมุฏฺฐาเปสุํ อาวุโส สตฺถา อญฺเญสํ อวิสยํ มงฺคลปญฺหํ สเทวกสฺส โลกสฺส จิตฺตํ คเหตฺวา กุกฺกุจฺจํ ภินฺทิตฺวา คคนตเล จนฺทํ อุฏฺฐาเปนฺโต วิย กเถสิ เอวํ มหาปญฺโญ อาวุโส ตถาคโตติ ฯ สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต อนจฺฉริยํ ภิกฺขเว อิทานิ สมฺโพธิปตฺตสฺส มม มงฺคลปญฺหกถนํ สฺวาหํ โพธิสตฺตกาเล จริยํ จรนฺโตปิ เทวมนุสฺสานํ กงฺขํ ฉินฺทิตฺวา มงฺคลปญฺหํ กเถสินฺติ วตฺวา อตีตํ อาหริ