๖ ยุธญฺชยชาตกํ ฯ

มิตฺตามจฺจปริพฺยุฬฺหนฺติ อิทํ สตฺถา เชตวเน วิหรนฺโต มหาภินิกฺขมนํ อารพฺภ กเถสิ ฯ

เอกทิวสมฺหิ ภิกฺขู ธมฺมสภายํ สนฺนิปติตฺวา อาวุโส สเจ ทสพโล อคารํ อชฺฌาวสิสฺสติ สกลจกฺกวาฬคพฺเภ จกฺกวตฺติราชา อภวิสฺส สตฺตรตนสมนฺนาคโต จตุริทฺธิสมิทฺโธ ปโรสหสฺสปุตฺตปริวาโร โส เอวรูปํ สิริวิภวํ ปหาย กาเมสุ โทสํ ทิสฺวา อฑฺฒรตฺติกสมเย ฉนฺนสหาเยน กณฺฐกมารุยฺห นครา นิกฺขมิตฺวา อโนมานทีตีเร ปพฺพชิตฺวา ฉ วสฺสานิ ทุกฺกรการิกํ กตฺวา สมฺมาสมฺโพธึ ปตฺโตติ สตฺถุ คุณกถํ กถยึสุ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมายนามาติ วุตฺเต น ภิกฺขเว อิทาเนว ตถาคโต มหาภินิกฺขมนํ นิกฺขนฺโต ปุพฺเพปิ ทฺวาทสโยชนิเก พาราณสินคเร รชฺชํ ปหาย นิกฺขนฺโตเยวาติ วตฺวา อตีตํ อาหริ

อตีเต รมฺมนคเร สพฺพทตฺโตนาม ราชา อโหสิ ฯ อยมฺหิ พาราณสิ อุทยชาตเก สุรุนฺธนนครํนาม ชาตํ จุลฺลสุตฺตโสมชาตเก สุทสฺสนํนาม โสณนนฺทชาตเก พฺรหฺมวฑฺฒนํนาม กณฺฐหาลชาตเก ปุปฺผวตีนาม อิมสฺมึ ปน ยุธญฺชยชาตเก รมฺมนครํนาม อโหสิ เอวมสฺสา กทาจิ นามํ ปริวตฺเตติ ฯ ตตฺถ สพฺพทตฺตรญฺโญ ปุตฺตา สหสฺสา อเหสุํ ยุธญฺชยสฺสนาม เชฏฺฐปุตฺตสฺส อุปรชฺชํ อทาสิ ฯ โส ทิวเส ทิวเส มหาทานํ ปวตฺเตสิ ฯ เอวํ คจฺฉนฺเต กาเล โพธิสตฺโต เอกทิวสํ ปาโตว รถวรมารุยฺห มหนฺเตน สิริวิภเวน อุยฺยานกีฬํ คจฺฉนฺโต รุกฺขคฺคติณคฺคสาขคฺคมกฏสุตฺตชาลาทีสุ สุตฺตชาลากาเรน ลคฺเค อุสฺสาววินฺทู ทิสฺวา สมฺม สารถิ กินฺนาเมตนฺติ ปุจฺฉิตฺวา เอเต เทว หิมสมเย ปตนกอุสฺสาววินฺทูนามาติ สุตฺวา ทิวสภาคํ อุยฺยาเน กีฬิตฺวา สายณฺหสมเย ปจฺจาคจฺฉนฺโต เต อทิสฺวา สมฺม สารถิ กหํ เอเต อุสฺสาววินฺทู น เตทานิ ปสฺสามีติ ปุจฺฉิตฺวา เทว เต สุริเย อุคฺคจฺฉนฺเต สพฺเพว ภิชฺชิตฺวา ปฐวิยํ ปตนฺตีติ สุตฺวา สํเวคปฺปตฺโต หุตฺวา อิเมสํ สตฺตานํ ชีวิตสงฺขาราปิ ติณคฺเค อุสฺสาววินฺทุสทิสา มยา พฺยาธิชรามรเณหิ อปีฬิเตเนว มาตาปิตโร อาปุจฺฉิตฺวา ปพฺพชิตุํ วฏฺฏตีติ อุสฺสาววินฺทุเมว อารมฺมณํ กตฺวา อาทิตฺเต วิย ตโย ภเว ปสฺสนฺโต อตฺตโน เคหํ อาคนฺตฺวา อลงฺกตปฏิยตฺตาย วินิจฺฉยสาลาย นิสินฺนสฺส ปิตุ สนฺติกํเยว คนฺตฺวา ปิตรํ วนฺทิตฺวา เอกมนฺเต ฐิโต ปพฺพชฺชํ ยาจนฺโต ปฐมํ คาถมาห