๔ กามชาตกํ ฯ

กามํ กามยมานสฺสาติ อิทํ สตฺถา เชตวเน วิหรนฺโต อญฺญตรํ พฺราหฺมณํ อารพฺภ กเถสิ ฯ

เอโก กิร สาวตฺถิวาสี พฺราหฺมโณ อจิรวติตีเร เขตฺตกรณตฺถาย อรญฺญํ โกเฏสิ ฯ สตฺถา ตสฺส อุปนิสฺสยํ ทิสฺวา สาวตฺถิยํ ปิณฺฑาย ปวิสนฺโต มคฺคา โอกฺกมฺม เตน สทฺธึ ปฏิสนฺถารํ กตฺวา กึ กโรสิ พฺราหฺมณาติ วตฺวา เขตฺตฏฺฐานํ โกฏาเปสึ โภ โคตมาติ วุตฺเต สาธุ พฺราหฺมณกมฺมํ กโรหีติ วตฺวา อคมาสิ ฯ เอเตเนวุปาเยน ฉินฺนรุกฺเข หาเรตฺวา เขตฺตสฺส โสธนกาเล เกทารพนฺธนกาเล วปนกาเลติ ปุนปฺปุนํ คนฺตฺวา เตน สทฺธึ ปฏิสนฺถารํ อกาสิ ฯ ปุนทิวเส โส พฺราหฺมโณ อชฺช โภ โคตม มยฺหํ วปฺปมงฺคลํ อหํ อิมสฺมึ สสฺเส นิปฺผนฺเน พุทฺธปฺปมุขสฺส ภิกฺขุสงฺฆสฺส มหาทานํ ทสฺสามีติ อาห ฯ สตฺถา ตุณฺหีภาเวน อธิวาเสตฺวา ปกฺกามิ ฯ ปุเนกทิวสํ พฺราหฺมโณ สสฺสํ โอโลเกนฺโต อฏฺฐาสิ ฯ สตฺถา ตตฺถ กึ กโรสิ พฺราหฺมณาติ ปุจฺฉิตฺวา สสฺสํ โอโลเกมิ โภ โคตมาติ วุตฺเต สาธุ พฺราหฺมณาติ วตฺวา ปกฺกามิ ฯ ตทา พฺราหฺมโณ จินฺเตสิ สมโณ โคตโม อภิณฺหํ อาคจฺฉติ นิสฺสํสยํ ภตฺเตน อตฺถิโก ทสฺสามิสฺส ภตฺตนฺติ ฯ ตสฺเสวํ จินฺเตตฺวา เคหํ คตทิวเส สตฺถาปิ ตตฺถ อคมาสิ ฯ อถ พฺราหฺมณสฺส อติวิย วิสฺสาโส อุปฺปชฺชิ ฯ อถาปรภาเค ปริณเต สสฺเส เสฺว เขตฺตํ ลายิสฺสามีติ สนฺนิฏฺฐานํ กตฺวา นิปนฺเน พฺราหฺมเณ อจิรวติยา อุปริ สพฺพรตฺตึ ฆนกรวสฺสํ วสฺสิ ฯ มโหโฆ อาคนฺตฺวา เอกนาลิมตฺตํปิ อเสเสตฺวา สพฺพํ สสฺสํ สมุทฺทํ ปเวเสสิ ฯ พฺราหฺมโณ โอฆมฺหิ โอสริเต สสฺสวินาสํ โอโลเกตฺวา สกภาเวน สณฺฐาเรตุํ นาสกฺขิ พลวโสกาภิภูโต หตฺเถน อุรํ ปหริตฺวา ปริเทวมาโน เคหํ คนฺตฺวา วิลปนฺโต นิปชฺชิ ฯ สตฺถา ปจฺจูสสมเย โสกาภิภูตํ พฺราหฺมณํ ทิสฺวา พฺราหฺมณสฺส อวสฺสโย ภวิสฺสามีติ ปุนทิวเส สาวตฺถิยํ ปิณฺฑาย จริตฺวา ปจฺฉาภตฺตํ ปิณฺฑปาตปฏิกฺกนฺโต ภิกฺขู วิหารํ เปเสตฺวา ปจฺฉาสมเณน สทฺธึ ตสฺส เคหทฺวารํ อคมาสิ ฯ พฺราหฺมโณ สตฺถุ อาคตภาวํ สุตฺวา ปฏิสนฺถารตฺถาย เม สหาโย อาคโต ภวิสฺสตีติ ลทฺธสฺสาโส อาสนํ ปญฺญาเปสิ ฯ สตฺถา ปวิสิตฺวา ปญฺญตฺตาสเน นิสีทิ พฺราหฺมณ กสฺมา ทุพฺพณฺโณสิ กินฺเต อผาสุกนฺติ ปุจฺฉิ ฯ โภ โคตม อจิรวติตีเร มยา รุกฺขจฺเฉทโต ปฏฺฐาย กตํ กมฺมํ ตุมฺเห ชานาถ อหํ อิมสฺมึ สสฺเส นิปฺผนฺเน ตุมฺหากํ ทานํ ทสฺสามีติ วกฺขามิ อิทานิ เม สพฺพนฺตํ สสฺสํ มโหโฆ สมุทฺทเมว ปเวเสสิ ตํ กิญฺจิ อวสิฏฺฐํ นตฺถิ สกฏสตมตฺตํ ธญฺญํ วินฏฺฐํ เตน เม มหาโสโก อุปฺปนฺโนติ ฯ กึ ปน พฺราหฺมณ โสจนฺตสฺส นฏฺฐํ ปุนาคจฺฉตีติ ฯ โนเหตํ โภ โคตมาติ ฯ เอวํ สนฺเตปิ กสฺมา โสจสิ อิเมสํ สตฺตานํ ธนธญฺญํนาม อุปฺปชฺชนกาเล อุปฺปชฺชติ นสฺสนกาเล นสฺสติ กิญฺจิ สงฺขารคตํ อนสฺสนธมฺมํนาม นตฺถิ มา จินฺตยีติ ฯ อิติ นํ สตฺถา สมสฺสาเสตฺวา ตสฺส สปฺปายธมฺมํ เทเสนฺโต กามสุตฺตํ กเถสิ ฯ สุตฺเต ปริโยสานํ คจฺฉนฺเต พฺราหฺมโณ โสตาปตฺติผเล ปติฏฺฐหิ ฯ สตฺถา ตํ นิสฺโสกํ กตฺวา อุฏฺฐายาสนา วิหารํ อคมาสิ ฯ สตฺถา อสุกํนาม พฺราหฺมณํ โสกสลฺลสมปฺปิตํ นิสฺโสกํ กตฺวา โสตาปตฺติผเล ปติฏฺฐาเปสีติ สกลนครํ อญฺญาสิ ฯ ภิกฺขู ธมฺมสภายํ กถํ สมุฏฺฐาเปสุํ อาวุโส ทสพโล พฺราหฺมเณน สทฺธึ เมตฺตึ กตฺวา วิสฺสาสิโก หุตฺวา อุปาเยเนว ตสฺส โสกสมปฺปิตสฺส ธมฺมํ เทเสตฺวา ตํ นิสฺโสกํ กตฺวา โสตาปตฺติผเล ปติฏฺฐาเปสีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมายนามาติ วุตฺเต น ภิกฺขเว อิทาเนว ปุพฺเพปาหํ เอตํ นิสฺโสกมกาสินฺติ วตฺวา อตีตํ อาหริ