ภลฺลาติกชาตกํ

ภลฺลาติโก นาม อโหสิ ราชาติ อิทํ สตฺถา เชตวเน วิหรนฺโต มลฺลิกํ เทวึ อารพฺภ กเถสิ ฯ

ตสฺสา กิร เอกทิวสํ รญฺญา สทฺธึ สยนํ นิสฺสาย กลโห โหติ ฯ ราชา กุชฺฌิตฺวา ตํ น โอโลเกสิ ฯ สา จินฺเตสิ นนุ ตถาคโต รญฺโญ มยิ กุทฺธภาวํ น ชานาตีติ ฯ สตฺถา ตํ การณํ ญตฺวา ปุนทิวเส ภิกฺขุสงฺฆปริวุโต สาวตฺถิยํ ปิณฺฑาย ปวิสิตฺวา รญฺโญ เคหทฺวารํ คโต ฯ ราชา ปจฺจุคฺคมนํ กตฺวา ปตฺตํ คเหตฺวา สตฺถารํ ปาสาทํ อาโรเปตฺวา ปฏิปาฏิยา ภิกฺขุสงฺฆํ นิสีทาเปตฺวา ทกฺขิโณทกํ ทตฺวา ปณีเตน อาหาเรน ปริวิสิตฺวา ภตฺตกิจฺจาวสาเน เอกมนฺตํ นิสีทิ ฯ สตฺถา กึ นุโข มหาราช มลฺลิกา น ปญฺญายตีติ ปุจฺฉิตฺวา อตฺตโน สุขมทมตฺตายาติ วุตฺเต นนุ มหาราช ตฺวํ ปุพฺเพ กินฺนรโยนิยํ นิพฺพตฺเตตฺวา เอกรตฺตึ กินฺนริยา วินา หุตฺวา สตฺต วสฺสสตานิ ปริเทวมาโน วิจรสีติ วตฺวา เตน ยาจิโต อตีตํ อาหริ ฯ

อตีเต พาราณสิยํ ภลฺลาติโก นาม ราชา รชฺชํ กาเรนฺโต องฺคารปกฺกมิคมํสํ ขาทิสฺสามีติ รชฺชํ อมจฺจานํ นิยฺยาเทตฺวา สนฺนทฺธปญฺจาวุโธ สุสิกฺขิตโกเลยฺยสุนขคณปริวุโต นครา นิกฺขมิตฺวา หิมวนฺตํ ปวิสิตฺวา อนุคงฺคํ คนฺตฺวา อุปริคงฺคํ อภิรุหิตุํ อสกฺโกนฺโต เอกํ คงฺคํ โอติณฺณนทึ ทิสฺวา ตทนุสาเรน คจฺฉนฺโต มิคสูกราทโย วธิตฺวา องฺคารปกฺกมํสํ ขาทนฺโต อุจฺจฏฺฐานํ อภิรุหิ ฯ ตตฺถ รมณียา นทิกา ฯ สา ปริปุณฺณกาเล ถนปฺปมาโณทกา หุตฺวา สนฺทติ ฯ อญฺญทา ชนฺนุกปฺปมาโณทกา โหติ ฯ ตตฺถ นานปฺปการกา มจฺฉกจฺฉปา วิจรนฺติ ฯ อุทกปริยนฺเต รชฏปฏฺฏวณฺณา วาลุกา อุโภสุ ตีเรสุ นานาปุปฺผผลภฺริตวินมิตา รุกฺขา ปุปฺผผลรสมตฺเตหิ นานาวิหงฺคมภมรคเณหิ สมฺปริกิณฺณา วิวิธมิคสงฺฆนิเสวิตา สีตจฺฉายา ฯ เอวํ รมณิยาย เหมวติยา นทิยา ตีเร เทฺว กินฺนรา อญฺญมญฺญํ อาลิงฺคิตฺวา ปริจุมฺพิตฺวา นานปฺปกาเรหิ ปริเทวนฺตา โรทนฺติ ฯ ราชา ตสฺสา นทิยา ตีเรน คนฺธมาทนํ อภิรุหนฺโต เต กินฺนเร ทิสฺวา กินฺนุ โข เอเต เอวํ ปริเทวนฺติ ปุจฺฉิสฺสามิ เนติ จินฺเตตฺวา สุนเข โอโลเกตฺวา อจฺฉรํ ปหริ ฯ สุสิกฺขิตโกเลยฺยกสุนขา ตาย สญฺญาย วนคุมฺพํ ปวิสิตฺวา อุเรน นิปชฺชึสุ ฯ โส เตสํ ปฏิสลฺลีนภาวํ ญตฺวา ธนุกลาปญฺเจว เสสาวุธานิ จ รุกฺขํ นิสฺสาย ฐเปตฺวา ปทสทฺทํ อกโรนฺโต สนิกํ เตสํ สนฺติกํ คนฺตฺวา กึการณา ตุมฺเห โรทถาติ กินฺนเร ปุจฺฉิ ฯ