๖. มุทุลกฺขณชาตกํ

เอกา อิจฺฉา ปุเร อาสีติ อิทํ สตฺถา เชตวเน วิหรนฺโต สงฺกิเลสํ อารพฺภ กเถสิ ฯ

เอโก กิร สาวตฺถีวาสี กุลปุตฺโต สตฺถุ ธมฺมเทสนํ สุตฺวา รตนสาสเน อุรํ ทตฺวา ปพฺพชิตฺวา ปฏิปนฺนโก โยคาวจโร อวิสฺสฏฺฐกมฺมฏฺฐาโน หุตฺวา เอกทิวสํ สาวตฺถิยํ ปิณฺฑาย จรมาโน เอกํ อลงฺกตปฏิยตฺตํ อิตฺถึ ทิสฺวา สุภวเสน อินฺทฺริยานิ ภินฺทิตฺวา โอโลเกสิ ฯ ตสฺส อพฺภนฺตเร กิเลโส จลิ วาสิยา อาโกฏิตขีรรุกฺโข วิย อโหสิ ฯ โส ตโต ปฏฺฐาย กิเลสวสิโก หุตฺวา เนว กายสฺสาทํ น จิตฺตสฺสาทํ ลภิ ภนฺตมิคสปฺปฏิภาโค สาสเน อนภิรโต ปรูฬฺหเกสโลโม ทีฆนโข กิลิฏฺฐจีวโร อโหสิ ฯ อถสฺส อินฺทริยวิการํ ทิสฺวา สหายกา ภิกฺขู กินฺนุ โข เต อาวุโส น ยถา โปราณานิ อินฺทฺริยานีติ ปุจฺฉึสุ ฯ อนภิรโตมฺหิ อาวุโสติ ฯ อถ นํ เต สตฺถุ สนฺติกํ นยึสุ ฯ สตฺถา กึ ภิกฺขเว อนิจฺฉมานํ ภิกฺขุํ อาทาย อาคตตฺถาติ ปุจฺฉิ ฯ อยํ ภนฺเต ภิกฺขุ อนภิรโตติ ฯ สจฺจํ กิร ตฺวํ ภิกฺขุ อนภิรโตติ ฯ สจฺจํ ภควาติ ฯ โก ตํ อุกฺกณฺฐาเปสีติ ฯ อหํ ภนฺเต ปิณฺฑาย จรนฺโต เอกํ อิตฺถึ ทิสฺวา อินฺทฺริยานิ ภินฺทิตฺวา โอโลเกสึ อถ เม กิเลโส จลิ เตนมฺหิ อุกฺกณฺฐิโตติ ฯ อถ นํ สตฺถา อนจฺฉริยเมตํ ภิกฺขุ ยํ ตฺวํ อินฺทฺริยานิ ภินฺทิตฺวา วิสภาคารมฺมณํ สุภวเสน โอโลเกนฺโต กิเลเสหิ กมฺปิโต ปุพฺเพ ปญฺจาภิญฺญาอฏฺฐสมาปตฺติลาภิโน ฌานพเลน กิเลเส วิกฺขมฺเภตฺวา วิสุทฺธจิตฺตา คคนตลจรา โพธิสตฺตาปิ อินฺทฺริยานิ ภินฺทิตฺวา วิสภาคารมฺมณํ โอโลกยมานา ฌานา ปริหายิตฺวา กิเลเสหิ กมฺปิตา มหาทุกฺขํ อนุภวึสุ น หิ สิเนรุอุปฺปาฏนกวาโต หตฺถิมตฺตมุณฺฑปพฺพตํ มหาชมฺพูอุมฺมูลกวาโต ฉินฺนตเฏ วิรูฬฺหคจฺฉกํ มหาสมุทฺทํ วา ปน สุสฺสนกวาโต ขุทฺทกตฬากํ กิสฺมิญฺจิเทว คณฺหติ เอวํ อุตฺตมพุทฺธีนํ นาม วิสุทฺธจิตฺตานํ โพธิสตฺตานํ อญฺญาณภาวกรา กิเลสา ตยิ กึ ลชฺชิสฺสนฺติ วิสุทฺธาปิ สตฺตา สงฺกิลิสฺสนฺติ อุตฺตมยสสมงฺคิโนปิ อยสํ ปาปุณนฺตีติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต กาสีรฏฺเฐ เอกสฺส มหาวิภวสฺส พฺราหฺมณสฺส กุเล นิพฺพตฺติตฺวา วิญฺญุตํ ปตฺโต สพฺพสิปฺปานํ ปารํ คนฺตฺวา กาเม ปหาย อิสิปพฺพชฺชํ ปพฺพชิตฺวา กสิณปริกมฺมํ กตฺวา อภิญฺญา จ สมาปตฺติโย จ อุปฺปาเทตฺวา ฌานสุเขน วีตินาเมนฺโต หิมวนฺตปฺปเทเส วาสํ กปฺเปสิ ฯ โส เอกสฺมึ กาเล โลณมฺพิลเสวนตฺถํ หิมวนฺตา โอตริตฺวา พาราณสึ ปตฺวา ราชุยฺยาเน วสิตฺวา ปุนทิวเส กตสรีรปฏิชคฺคโน รตฺตวากมยํ นิวาสนปารุปนํ สณฺฐเปตฺวา อชินจมฺมํ เอกํสงฺกตฺวา ชฏามณฺฑลํ พนฺธิตฺวา ขาริกาชมาทาย พาราณสิยํ ภิกฺขาย จรมาโน รญฺโญ ฆรทฺวารํ ปาปุณิ ฯ ราชา ตสฺส อิริยาปเถเยว ปสีทิตฺวา ปกฺโกสาเปตฺวา มหารเห อาสเน นิสีทาเปตฺวา ปณีเตน ขาทนีเยน โภชนีเยน สนฺตปฺเปตฺวา ตํ กตานุโมทนํ อุยฺยาเน วสนตฺถาย ยาจิ ฯ โส สมฺปฏิจฺฉิ ฯ ราชเคเห ภุญฺชิตฺวา ราชกุลํ โอวทมาโน ตสฺมึ อุยฺยาเน โสฬส วสฺสานิ วสิ ฯ อเถกทิวสํ ราชา กุปฺปิตํ ปจฺจนฺตํ วูปสเมตุํ คจฺฉนฺโต มุทุลกฺขณนฺนาม อคฺคมเหสึ อปฺปมตฺตา อยฺยสฺส อุปฏฺฐานํ กโรหีติ วตฺวา อคมาสิ ฯ