๓. สจฺจํกิรชาตกํ

สจฺจํ กิเรวมาหํสูติ อิทํ สตฺถา เวฬุวเน วิหรนฺโต วธาย ปริสกฺกนํ อารพฺภ กเถสิ ฯ ภิกฺขุสงฺเฆ หิ ธมฺมสภายํ นิสีทิตฺวา อาวุโส เทวทตฺโต สตฺถุ คุณํ น ชานาติ วธาย ปริสกฺกตีติ เทวทตฺตสฺส อคุณํ กเถนฺเต สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว เทวทตฺโต มยฺหํ วธาย ปริสกฺกติ ปุพฺเพปิ ปริสกฺกิเยวาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต ตสฺส ทุฏฺฐกุมาโร นาม ปุตฺโต อโหสิ กกฺขโฬ ผรุโส ปหฏาสีวิสูปโม อนกฺโกสิตฺวา วา อปฺปหริตฺวา วา เกนจิ สทฺธึ น กเถสิ ฯ โส อนฺโตชนสฺส จ พหิชนสฺส จ อกฺขิมฺหิ ปติตรชํ วิย ขาทิตุํ อาคตปิสาโจ วิย จ อมนาโป อโหสิ อุพฺเพชนีโย ฯ โส เอกทิวสํ นทีกีฬํ กีฬิตุกาโม มหนฺเตน ปริวาเรน นทีตีรํ อคมาสิ ฯ ตสฺมึ ขเณ มหาเมโฆ อุฏฺฐหิ ทิสา อนฺธการา ชาตา ฯ โส ทาสเปสฺสชนํ อาห เอถ ภเณ มํ คเหตฺวา นทีมชฺฌํ เนตฺวา นฺหาเปตฺวา อาเนถาติ ฯ เต ตํ ตตฺถ เนตฺวา กินฺโน ราชา กริสฺสติ อิมํ ปาปปุริสํ เอตฺเถว มาเรมาติ มนฺตยิตฺวา เอตฺถ คจฺฉ กาฬกณฺณีติ อุทเก โอปิลาเปตฺวา ปจฺจุตฺตริตฺวา ตีเร อฏฺฐํสุ ฯ กหํ กุมาโรติ วุตฺเต น มยํ กุมารํ ปสฺสาม เมฆํ อุฏฺฐิตํ ทิสฺวา อุทเก นิมุชฺชิตฺวา ปุรโต อาคโต ภวิสฺสตีติ อมจฺจา รญฺโญ สนฺติกํ อคมํสุ ฯ ราชา กหํ เม ปุตฺโตติ ปุจฺฉิ ฯ น ชานาม เทว เมเฆ อุฏฺฐิเต ปุรโต อาคโต ภวิสฺสตีติ สญฺญายาคตมฺหาติ ฯ ราชา ทฺวารํ วิวราเปตฺวา นทีตีรํ คนฺตฺวา วิจินถาติ ตตฺถ ตตฺถ วิจินาเปสิ ฯ โกจิ กุมารํ นาทฺทส ฯ โสปิ โข เมฆนฺธกาเร เทเว วสฺสนฺเต นทิยา วุยฺหมาโน เอกํ ทารุกฺขนฺธํ ทิสฺวา ตตฺถ นิสีทิตฺวา มรณภยตชฺชิโต ปริเทวมาโน คจฺฉติ ฯ

ตสฺมึ ปน กาเล พาราณสีวาสี เอโก เสฏฺฐี นทีตีเร จตฺตาฬีสโกฏิธนํ นิทหิตฺวา ธนตณฺหาย ธนปิฏฺเฐ สปฺโป หุตฺวา นิพฺพตฺติ ฯ อปโรปิ ตสฺมึเยว ปเทเส ตึสโกฏิโย นิทหิตฺวา ธนตณฺหาย ตตฺเถว อุนฺทุโร หุตฺวา นิพฺพตฺติ ฯ เตสํ วสนฏฺฐานํ อุทกํ ปาวิสิ ฯ เต อุทกสฺส ปวิฏฺฐมคฺเคเนว นิกฺขมิตฺวา โสตํ ฉินฺทนฺตา คนฺตฺวา ตํ ราชกุมาเรน อภินิสินฺนํ รุกฺขกฺขนฺธํ ปตฺวา เอโก เอกํ โกฏึ อิตโร อิตรํ อารุยฺห ขนฺธปิฏฺเฐเยว นิปชฺชึสุ ฯ ตสฺสาเยว โข ปน นทิยา ตีเร เอโก สิมฺพลิรุกฺโข อตฺถิ ฯ ตตฺเถโก สุวโปตโก วสติ ฯ โสปิ รุกฺโข อุทเกน โธตมูโล นทีปิฏฺเฐ ปติ ฯ สุวโปตโก เทเว วสฺสนฺเต อุปฺปติตฺวา คนฺตุํ อสกฺโกนฺโต คนฺตฺวา ตสฺเสว ขนฺธสฺส เอกปสฺเส นิลียิ ฯ เอวํ เต จตฺตาโร ชนา เอกโต วุยฺหมานา คจฺฉนฺติ ฯ