โสตฺถิปารํ คมิสฺสนฺติ วลาเหเนว วาณิชาติ ฯ

ตตฺถ เย น กาหนฺตีติ เย น กริสฺสนฺติ ฯ พฺยสนํ เต คมิสฺสนฺตีติ เต มหาวินาสํ ปาปุณิสฺสนฺติ ฯ รกฺขสีหิว วาณิชาติ รกฺขสีหิ ปโลภิตา วาณิชา วิย ฯ โสตฺถิปารํ คมิสฺสนฺตีติ อนนฺตราเยน นิพฺพานํ ปาปุณิสฺสนฺติ ฯ วลาเหเนว วาณิชาติ วลาเหเนว อาคจฺฉถาติ วุตฺตา ตสฺส วจนกรา วาณิชา วิย ฯ ยถา หิ เต สมุทฺทปารํ คนฺตฺวา สกสกฏฺฐานานิ อคมํสุ, เอวํ พุทฺธานํ โอวาทกรา สํสารปารํ นิพฺพานํ คจฺฉนฺตีติ อมตมหานิพฺพาเนน ธมฺมเทสนาย กูฏํ คณฺหิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน อุกฺกณฺฐิตภิกฺขุ โสตาปตฺติผเล ปติฏฺฐหิ ฯ อญฺเญ พหู โสตาปตฺติผลสกิทาคามิผลอนาคามิผลอรหตฺตผลานิ ปาปุณึสุ ฯ ตทา วลาหกสฺสราชสฺส วจนกรา อฑฺฒเตยฺยสตา วาณิชา พุทฺธปริสา อเหสุํ, วลาหกสฺสราชา ปน อหเมวาติ ฯ

วลาหกสฺสราชชาตกํ ฉฏฺฐํ ฯ