ตตฺถ ธีราติ ธิติมาติ ธีรา วิคตปาปาติ ธีรา, อถ วา ธี วุจฺจติ ปญฺญา, ตาย ปญฺญาย สมนฺนาคตาติ ธีรา, พุทฺธา ปจฺเจกพุทฺธา พุทฺธสาวกา โพธิสตฺตา จ อิเม ธีรา นาม ฯ ยทายสนฺติ อาทีสุ ยํ สงฺขลิกสงฺขาตํ อยสา นิพฺพตฺตํ อยสํ อนฺทุพนฺธนสงฺขาตํ ทารุชํ ยญฺจ ปพฺพชติเณหิ วา อญฺเญหิ วา วากาทีหิ รชฺชุํ กตฺวา กตํ รชฺชุพนฺธนํ ตํ ธีรา ทฬฺหํ ถิรนฺติ นาหุ น กเถนฺติ ฯ สารตฺตรตฺตาติ สารตฺตา หุตฺวา รตฺตา พหลราครตฺตาติ อตฺโถ ฯ มณิกุณฺฑเลสูติ มณีสุ จ กุณฺฑเลสุ จ มณิยุตฺเตสุ วา กุณฺฑเลสุ ฯ เอตํ ทฬฺหนฺติ เย จ มณิกุณฺฑเลสุ สารตฺตรตฺตา เตสํ เยว โย สาราโค ยา จ เตสํ ปุตฺตทาเรสุ อเปกฺขา ตณฺหา เอตํ กิเลสมยํ พนฺธนํ ทฬฺหํ ถิรนฺติ ธีรา อาหุ ฯ โอหารินนฺติ อากฑฺฒิตฺวา จตูสุ อปาเยสุ ปาตนโต อวหรติ เหฏฺฐา เหฏฺฐา หรตีติ โอหารินํ ฯ สิถิลนฺติ พนฺธนฏฺฐาเนสุ ฉวิจมฺมมํสานิ น ฉินฺทติ โลหิตํ น นีหรติ พนฺธนภาวมฺปิ น ชานาเปตฺวา ถลปถชลปถาทีสุ กมฺมานิ กาตุํ เทตีติ สิถิลํ ฯ ทุปฺปมุญฺจนฺติ ตณฺหาโลภวเสน หิ เอกวารมฺปิ อุปฺปนฺนํ กิเลสพนฺธนํ พนฺธนฏฺฐานโต กจฺฉโป วิย ทุมฺโมจยํ โหตีติ ทุปฺปมุญฺจํ ฯ เอตมฺปิ เฉตฺวานาติ เอตํ เอวํ ทฬฺหมฺปิ กิเลสพนฺธนํ ญาณขคฺเคน ฉินฺทิตฺวา อยทามานิ เฉตฺวา มตฺตวรวารโณ วิย ปญฺชเร ภินฺทิตฺวา สีหโปตโก วิย ธีรา วตฺถุกามกิเลสกาเม อุกฺการภูมิยํ วิย ชิคุจฺฉมานา อนเปกฺขิโน หุตฺวา กามสุขํ ปหาย วชนฺติ ปกฺกมนฺติ ปกฺกมิตฺวา จ ปน หิมวนฺตํ ปวิสิตฺวา อิสิปพฺพชฺชํ ปพฺพชิตฺวา ฌานสุเขน วีตินาเมนฺตีติ อตฺโถ ฯ

เอวํ โพธิสตฺโต อิมํ อุทานํ อุทาเนตฺวา อปริหีนชฺฌาโน พฺรหฺมโลกปารายโน อโหสิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสสิ ฯ สจฺจปริโยสาเน เกจิ โสตาปนฺนา เกจิ สกิทาคามิโน เกจิ อนาคามิโน เกจิ อรหนฺตา อเหสุํ ฯ ตทา มาตา มหามายา อโหสิ, ปิตา สุทฺโธทนมหาราชา, ภริยา ราหุลมาตา, ปุตฺโต ราหุโล, ปุตฺตทารํ ปหาย นิกฺขมิตฺวา ปพฺพชิตปุริโส ปน อหเมวาติ ฯ

พนฺธนาคารชาตกํ ปฐมํ ฯ