ตสฺสตฺโถ อหํ มหาราช อรโก นาม ตาปโส หุตฺวา สตฺต วสฺสานิ เมตฺตจิตฺตํ ภาเวตฺวา สตฺต สํวฏฺฏวิวฏฺฏกปฺเป พฺรหฺมโลเก วสึ, สฺวาหํ ทีฆรตฺตํ เมตฺตาภาวนาย อาจิณฺณปริจิณฺณตาย อกฺโกธโน ชาโตติ ฯ

เอวํ ฉตฺตปาณินา อตฺตโน จตูสุ องฺเคสุ กถิเตสุ ราชา ปริสาย อิงฺคิตสญฺญํ อทาสิ ฯ ตํ ขณญฺเญว อมจฺจา จ พฺราหฺมณคหปติกาทโย จ อุฏฺฐหิตฺวา อเร ลญฺจขาทก ทุฏฺฐโจร ตฺวํ ลญฺจํ อลภิตฺวา ปณฺฑิตํ มาเรตุกาโม ชาโตติ กาฬกํ หตฺถปาเทสุ คเหตฺวา ราชนิเวสนา โอตริตฺวา คหิตคหิเตหิ ปาสาณมุคฺคเรหิ สีสํ ภินฺทิตฺวา ชีวิตกฺขยํ ปาเปตฺวา ปาเทสุ คเหตฺวา กฑฺฒนฺตา สงฺการฏฺฐาเนสุ ฉฑฺเฑสุํ ฯ ตโต ปฏฺฐาย ราชา ธมฺเมน รชฺชํ กาเรนฺโต ยถากมฺมํ คโต ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา กาฬโก เสนาปติ เทวทตฺโต อโหสิ, ฉตฺตปาณิกปฺปโก สาริปุตฺโต, ธมฺมทฺธโช ปน อหเมวาติ ฯ

ธมฺมทฺธชชาตกํ ทสมํ ฯ