ตตฺถ นเม นมนฺตสฺส ภเช ภชนฺตนฺติ โย อตฺตโน นมติ ตสฺเสว ปฏินเมยฺย, โย จ ภชติ ตญฺเญว ภเชยฺย ฯ กิจฺจานุกุพฺพสฺส กเรยฺย กิจฺจนฺติ อตฺตโน อุปฺปนฺนํ กิจฺจํ อนุกุพฺพนฺตสฺเสว ตสฺสาปิ อุปฺปนฺนกิจฺจํ ปฏิกเรยฺย ฯ จเช จชนฺตํ, วนถํ น กยิราติ อตฺตานํ ชหนฺตํ ชเหเถว, กิญฺจิ ตสฺมึ ตณฺหาสงฺขาตํ วนถํ น กเรยฺย ฯ อเปตจิตฺเตนาติ วิคตจิตฺเตน วิปลฺลฏฺฐจิตฺเตน ฯ น สมฺภเชยฺยาติ ตถารูเปน สทฺธึ น สมาคจฺเฉยฺย ฯ ทิโช ทุมนฺติ ยถา สกุโณ ปุพฺเพ ผลิตมฺปิ รุกฺขํ ผเล ขีเณ ขีณผโล อยนฺติ ญตฺวา ตํ ฉฑฺเฑตฺวา อญฺญํ สเมกฺขติ ปริเยสติ เอวํ อญฺญํ สเมกฺเขยฺย, มหา หิ เอส โลโก, อวสฺสํ ตุมฺเหสุ สเสฺนหํ เอกํ ปุริสํ ลภิสฺสถาติ ฯ

ตํ สุตฺวา พาราณสิราชา เทวิยา สพฺพิสฺสริยํ อทาสิ ฯ ตโต ปฏฺฐาย สมคฺคา สมฺโมทมานา วสึสุ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน เทฺว ชายปติกา โสตาปตฺติผเล ปติฏฺฐหึสุ ฯ ตทา ชายปติกา อิเมว เทฺว ชายปติกา อเหสุํ, ปณฺฑิตามจฺโจ ปน อหเมวาติ ฯ

ปุฏภตฺตชาตกํ ตติยํ ฯ