ตตฺถ คชคฺคเมเฆภีติ อคฺคคชเมเฆภิ โกญฺจนาทํ คชฺชิตํ คชฺเชนฺเตหิ มตฺตวารณวลาหเกหีติ อตฺโถ ฯ หยคฺคมาลิภีติ อคฺคหยมาลีภิ วรสินฺธวมาลาคุเลหิ อสฺสานิเกหีติ อตฺโถ ฯ รถูมิชาเตภีติ สญฺชาต- อูมิเวเคหิ สาคเร สลิเลหิ วิย สญฺชาตรถอูมีหิ รถานิเกหีติ อตฺโถ ฯ สราภิวสฺสภีติ เตหิ เยว รถานิเกหิ ฆนวสฺสเมโฆ วิย สรวสฺสํ วสฺสนฺเตหิ ฯ ธนุคฺคหาวฏฺฏทฬฺหปฺปหาริภีติ ธนุคฺคเหหิ อาวฏฺฏ- ทฬฺหปฺปหาริภิ อิโต จิโต จ อาวตฺติตฺวา ปริวตฺติตฺวา ทฬฺหปฺปหรนฺเตหิ คหิตขคฺครตนธนุทณฺเฑหิ ปตฺติโยเธหิ วาติ อตฺโถ ฯ ปริวาริตา ตกฺกสิลา สมนฺตโตติ ยถา อยํ ตกฺกสิลา ปริวาริตา โหติ สีฆํ ตถา กโรถาติ อตฺโถ ฯ อภิธาวถา จุปฺปตถาติ เวเคน ธาวถ เจว อุปฺปตถ จ ฯ วิวิธวินทิตาว ทนฺติภีติ วรวารเณหิ สทฺธึ วิวิธวินทิตา ภวถ เสลิตคชฺชิตวาทิเตหิ นานาวิรวา โหถาติ อตฺโถ ฯ วตฺตตชฺช ตุมุโล โฆโสติ วตฺตตุ อชฺช ตุมุโล มหนฺโต อสนิสทฺทสทิโส โฆโส ฯ ยถา วิชฺชุตา ชลธรสฺส คชฺชโตติ ยถา คชฺชนฺตสฺส ชลธรสฺส มุขโต นิคฺคตา วิชฺชุตา วิจรนฺติ เอวํ วิจรนฺตา นครํ ปริวาเรตฺวา รชฺชํ คณฺหถาติ วทติ ฯ

อิติ โส ราชา คชฺชิตฺวา เสนํ วิจาเรตฺวา นครทฺวารสมีปํ คนฺตฺวา ทฺวารโกฏฺฐกํ ทิสฺวา อิทํ รญฺโญ วสนเคหนฺติ ปุจฺฉิตฺวา อยํ นครทฺวารโกฏฺฐโกติ วุตฺเต นครทฺวารโกฏฺฐโก ตาว เอวรูโป, รญฺโญ นิเวสนํ กีทิสํ ภวิสฺสตีติ วตฺวา เวชยนฺตปาสาทสทิสนฺติ สุตฺวา เอวํ ยสสมฺปนฺเนน รญฺญา สทฺธึ ยุชฺฌิตุํ น สกฺขิสฺสามาติ ทฺวารโกฏฺฐกํ ทิสฺวา นิวตฺเตตฺวา ปลายิตฺวา พาราณสิเมว อคมาสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา พาราณสิราชา ปลายิปริพฺพาชโก อโหสิ, ตกฺกสิลราชา ปน อหเมวาติ ฯ

ปลายิชาตกํ นวมํ ฯ