ตสฺสตฺโถ อหํ อยฺย เอกํ อุสภํ ทิสฺวา คุนฺนํ เชฏฺฐกสฺส ปิฏฺฐิยํ กกุธํ โหติ, อิมสฺสาปิ ตํ อตฺถิ, อิมินา ปุริสูสเภน ภวิตพฺพนฺติ เอวมหํ ขุชฺชํ ปุริสูสภํ มญฺญมานา อกามยึ, สฺวายํ ยถา นาม ฉินฺนตนฺติ สโทณิโก วีณาทณฺฑโก เอวํ สงฺกุฏิโต เสตีติ ฯ

โพธิสตฺโต ตสฺสา อญฺญาตกเวเสน นิกฺขนฺตภาวํ ญตฺวา นหาเปตฺวา อลงฺกริตฺวา รถํ อาโรเปตฺวา อตฺตโน เคหเมว อคมาสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา เสฏฺฐิธีตา อยเมว เสฏฺฐิธีตา อโหสิ, พาราณสิเสฏฺฐี ปน อหเมวาติ ฯ

วีณาถูณชาตกํ ทุติยํ ฯ