๖ พกชาตกํ

ภทฺทโก วตายํ ปกฺขีติ อิทํ สตฺถา เชตวเน วิหรนฺโต เอกํ กุหกํ อารพฺภ กเถสิ ฯ

ตํ หิ สตฺถา อาเนตฺวา ทสฺสิตํ ทิสฺวา น ภิกฺขเว อิทาเนว กุหโก, ปุพฺเพเปส กุหโก เยวาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต หิมวนฺตปฺปเทเส เอกสฺมึ สเร มจฺโฉ หุตฺวา มหาปริวาโร วสิ ฯ อเถโก พโก มจฺเฉ ขาทิสฺสามีติ สรสฺส อาสนฺนฏฺฐาเน สีสํ ปาเตตฺวา ปกฺเข ปสาเรตฺวา มนฺทมนฺโท มจฺเฉ โอโลเกนฺโต อฏฺฐาสิ เตสํ ปมาทํ อาคมยมาโน ฯ ตสฺมึ ขเณ โพธิสตฺโต มจฺฉคณปริวุโต โคจรํ คณฺหนฺโต ตํ ฐานํ ปาปุณิ ฯ มจฺฉคโณ ตํ พกํ ปสฺสิตฺวา ปฐมํ คาถมาห