กุณฺฑกกุจฺฉิสินฺธวชาตกํ

ภุตฺวา ติณปริฆาสนฺติ อิทํ สตฺถา เชตวเน วิหรนฺโต สารีปุตฺตตฺเถรํ อารพฺภ กเถสิ ฯ

เอกสฺมึ หิ สมเย สมฺมาสมฺพุทฺโธ สาวตฺถิยํ วสิตฺวา วสฺสํ วุฏฺโฐ จาริกํ จริตฺวา ปุน ปจฺจาคโต ฯ มนุสฺสา อาคนฺตุกสกฺการํ กริสฺสามาติ พุทฺธปฺปมุขสฺส ภิกฺขุสงฺฆสฺส มหาทานํ ททนฺติ ฯ วิหาเร เอกํ ธมฺมโฆสกํ ภิกฺขุํ ฐเปสุํ ฯ โส เย อาคนฺตฺวา ยตฺตเก ภิกฺขู อิจฺฉนฺติ เตสํ เต ภิกฺขู วิจาเรตฺวา เทติ ฯ อเถกา ทุคฺคตา มหลฺลิกา อิตฺถี เอกเมว ปฏิวึสํ สชฺเชตฺวา เตสํ มนุสฺสานํ ภิกฺขูสุ วิจาเรตฺวา ทินฺเนสุ อุสฺสุเร ธมฺมโฆสกสฺส สนฺติกํ อาคนฺตวา มยฺหํ เอกํ ภิกฺขุํ เทถาติ อาห ฯ โส มยา สพฺเพ ภิกฺขู วิจาเรตฺวา ทินฺนา สารีปุตฺตตฺเถโร ปน วิหาเรเยว วสติ ตฺวํ ตสฺส ภิกฺขํ เทหีติ อาห ฯ สา สาธูติ ตุฏฺฐจิตฺตา เชตวนทฺวารโกฏฺฐเก ฐตฺวา เถรสฺส อาคตกาเล วนฺทิตฺวา หตฺถโต ปตฺตํ คเหตฺวา ฆรํ เนตฺวา เคเห นิสีทาเปสิ ฯ เอกาย กิร มหลฺลิกาย ธมฺมเสนาปติ อตฺตโน ฆเร นิสีทาปิโตติ พหูนิ สทฺธานิ กุลานิ อสฺโสสุํ ฯ เตสุ ราชา ปสฺเสนทิโกสโล ตํ ปวุตฺตึ สุตฺวา ตสฺสา สาฏเกน จ สหสฺสตฺถวิกาย จ สทฺธึ ภตฺตโภชนานิ ปหิณิ มยฺหํ อยฺยํ ปริวิสมานา อิมํ สาฏกํ นิวาเสตฺวา อิเม กหาปเณ วลญฺเชตฺวา เถรํ ปริวิสตูติ ฯ ยถา จ ราชา เอวํ อนาถปิณฺฑิโก จุลฺลอนาถปิณฺฑิโก วิสาขา มหาอุปาสิกาปิ ปหิณึสุ ฯ อญฺญานิ ปน กุลานิ เอกสตเทฺวสตาทิวเสน อตฺตโน พลานุรูเปน กหาปเณ ปหิณึสุ ฯ เอวํ เอกาเหเนว สา มหลฺลิกา สตสหสฺสมตฺตํ ลภิ ฯ เถโร ปน ตาย ทินฺนํ ยาคุเมว ปิวิตฺวา ตาย กตํ ขชฺชกเมว ปกฺกภตฺตเมว จ ปริภุญฺชิตฺวา ภตฺตานุโมทนํ กตฺวา ตํ มหลฺลิกํ โสตาปตฺติผเล ปติฏฺฐาเปตฺวา วิหารเมว อคมาสิ ฯ ธมฺมสภายํ ภิกฺขู เถรสฺส คุณกถํ สมุฏฺฐาเปสุํ อาวุโส ธมฺมเสนาปติ มหลฺลิกํ คหปตานึ ทุคฺคตภาวโต โมเจตฺวา ปติฏฺฐา อโหสิ ตาย ทินฺนํ อาหารํ อชิคุจฺฉนฺโต ปริภุญฺชตีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว สารีปุตฺโต อิทาเนว เอติสฺสา มหลฺลิกาย อวสฺสโย ชาโต น อิทาเนว ตาย ทินฺนํ อาหารมชิคุจฺฉนฺโต ปริภุญฺชติ ปุพฺเพปิ ปริภุญฺชติเยวาติ วตฺวา อตีตํ อาหริ ฯ