ตตฺถ ยตฺถาติ ยสฺมึ ฐาเน ฯ โปสนฺติ สตฺตํ ฯ ชาติยา วินเยน วาติ ชาติสมฺปนฺโน วา เอส น วา อาจารยุตฺโต วา น วาติ เอวํ น ชานนฺติ ฯ มหาพฺรหฺเมติ ครุกํ อาลปนํ อาลปนฺโต อาห ฯ ยาทิโสยนฺติ ยาทิโส อยํ ฯ อตฺตานํ สนฺธาย วทติ ฯ ชานนฺโต ชานมาคมฺมาติ อหํ อตฺตโน พลํ ชานนฺโต ชานนฺตเมว ตํ อาคมฺม ปฏิจฺจ ตว สนฺติเก กุณฺฑกํ น ภุญฺชามิ น หิ ตฺวํ กุณฺฑกํ โภชาเปตุกามตาย ฉ สหสฺสานิ ทตฺวา มํ คณฺหสีติ ฯ

ตํ สุตฺวา โพธิสตฺโต ตว วีมํสนตฺถาย ตํ มยา กตํ มา กุชฺฌีติ ตํ สมสฺสาเสตฺวา สุโภชนํ โภเชตฺวา อาทาย ราชงฺคณํ คนฺตฺวา เอกสฺมึ ปสฺเส ปญฺจ อสฺสสตานิ กตฺวา เอกสฺมึ ปสฺเส จิตฺตสาณิยา ปริกฺขิปิตฺวา เหฏฺฐา อตฺถรกํ ปตฺถริตฺวา อุปริ เจลวิตานํ พนฺธิตฺวา สินฺธวโปตกํ ฐเปสิ ฯ ราชา อาคนฺตฺวา อสฺเส โอโลเกนฺโต อยํ อสฺโส กสฺมา วิสุํ ฐปิโตติ ปุจฺฉิตฺวา มหาราช อยํ สินฺธโว อิเมสุ อสฺเสสุ วิสุํ อกโต โมเจสฺสตีติ สุตฺวา โสภโน โภ สินฺธโวติ ปุจฺฉิ ฯ โพธิสตฺโต อาม มหาราชาติ วตฺวา เตนหิสฺส ชวํ ปสฺสิสฺสามีติ วุตฺเต ตํ อสฺสํ กปฺปาเปตฺวา อภิรูหิตฺวา ปสฺสถ มหาราชาติ มนุสฺเส อุสฺสาราเปตฺวา ราชงฺคเณ ปาเหสิ ฯ สพฺพํ ราชงฺคณํ นิรนฺตรํ อสฺสปนฺตีหิ ปริกฺขิตฺตมิว อโหสิ ฯ ปุน โพธิสตฺโต ปสฺสถ มหาราช สินฺธวโปตกสฺส เวคนฺติ วิสชฺเชสิ ฯ เอกปุริโสปิ ตํ น อทฺทส ฯ ปุน รตฺตปฏํ อุทเร ปริกฺขิปิตฺวา วิสชฺเชสิ ฯ รตฺตปฏเมวสฺส อุทเร กตํ มหาชนา ปสฺสึสุ ฯ อถ นํ อนฺโตนคเร เอกิสฺสา โปกฺขรณิยา อุทกปิฏฺเฐ วิสชฺเชสิ ฯ ตตฺถสฺส อุทกปิฏฺเฐ ธาวโต ขุรคฺคานิปิ น เตมึสุ ฯ ปุเนกวารํ ปทุมินิปตฺตานํ อุปริ ธาวนฺโต เอกปณฺณมฺปิ อุทเก น โอสีทาเปสิ ฯ เอวมสฺส ชวนสมฺปทํ ทสฺเสตฺวา โอรุยฺห ปาณึ ปหริตฺวา หตฺถตลํ อุปนาเมสิ ฯ อสฺโส อุคฺคนฺตฺวา จตฺตาโร ปาเท เอกโต กตฺวา หตฺถตเล อฏฺฐาสิ ฯ อถ มหาสตฺโต ราชานํ อาห มหาราช อิมสฺส อสฺสโปตกสฺส สพฺพากาเรน เวเค ทสฺสนียมาเน สมุทฺทปริยนฺเต รฏฺเฐ นิกฺขิปนฺโต นปฺปโหตีติ ฯ ราชา ตุสฺสิตฺวา มหาสตฺตสฺส อุปรชฺชํ อทาสิ สินฺธวโปตกมฺปิ อภิสิญฺจิตฺวา มงฺคลอสฺสํ อกาสิ ฯ โส รญฺโญ ปิโย อโหสิ มนาโป ฯ สกฺกาโรปิสฺส มหา อโหสิ ฯ ตสฺสาปิ วสนฏฺฐานํ รญฺโญ อลงฺกตปฏิยตฺโต วาสิตฆรคพฺโภ วิย อโหสิ ฯ จตุชาติกคนฺเธหิ ภูมิเลปนํ อกํสุ ฯ คนฺธทามมาลาทามาทีนิ โอสฺสารยึสุ ฯ อุปริ สุวณฺณตารกวิจิตฺตํ เจลวิตานํ อโหสิ ฯ สมนฺตา จิตฺรสาณิ ปริกฺขิตฺตาว อโหสิ ฯ นิจฺจํ คนฺธเตลปฺปทีโป ฌายิ ฯ อุจฺจารปสฺสาวฏฐาเนปิสฺส สุวณฺณกฏาหํ ฐปยึสุ ฯ นิจฺจํ ราชโภชนเมว ภุญฺชิ ฯ ตสฺส ปน อาคตกาลโต ปฏฺฐาย รญฺโญ สกลชมฺพูทีปรชฺชํ หตฺถคตเมว อโหสิ ฯ ราชา โพธิสตฺตสฺส โอวาเท ฐตฺวา ทานาทีนิ ปุญฺญานิ กตฺวา สคฺคปรายโน อโหสิ ฯ