สุกชาตกํ

ยาว โส มตฺตมญฺญาสีติ อิทํ สตฺถา เชตวเน วิหรนฺโต เอกํ อติพหุํ ภุญฺชิตฺวา อชีรเกน กาลกตํ ภิกฺขุํ อารพฺภ กเถสิ ฯ

ตสฺมึ กิร เอวํ กาลกเต ธมฺมสภายํ ภิกฺขู ตสฺส อคุณกถํ สมุฏฺฐาเปสุํ อาวุโส อสุโก ภิกฺขุ อตฺตโน กุจฺฉิปฺปมาณํ อชานิตฺวา อติโภชนํ ภุญฺชิตฺวา ชีราเปตุํ อสกฺโกนฺโต กาลกโตติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพเปส อติโภชนปจฺจเยน มโตติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต หิมวนฺตปฺปเทเส สุกโยนิยํ นิพฺพตฺติตฺวา อเนกานํ สุกสหสฺสานํ สมุทฺทานุคเต หิมวนฺตปฺปเทเส วสนฺโต ราชา อโหสิ ฯ ตสฺเสโก ปุตฺโต อโหสิ ฯ ตสฺมึ วยปฺปตฺเต โพธิสตฺโต ทุพฺพลจกฺขุ อโหสิ ฯ สุกานํ กิร สีฆเวโค อโหสิ ฯ เตน เตสํ มหลฺลกกาเล ปฐมํ จกฺขุเมว ทุพฺพลํ อโหสิ ฯ โส มาตาปิตโร กุลาวเกเยว กตฺวา โคจรํ อาหริตฺวา โปเสสิ ฯ โส เอกทิวสํ โคจรภูมึ คนฺตฺวา ปพฺพตมตฺถเก ฐิโต สมุทฺทํ โอโลเกนฺโต เอกํ ทีปกํ ปสฺสิ ฯ ตสฺมึ ปน สุวณฺณวณฺณํ มธุรผลํ อมฺพวนํ อตฺถิ ฯ โส ปุนทิวเส โคจรเวลาย อุปฺปติตฺวา ตสฺมึ อมฺพวเน โอตริตฺวา อมฺพรสํ ปิวิตฺวา อมฺพปกฺกํ อาทาย คนฺตฺวา มาตาปิตูนํ อทาสิ ฯ โพธิสตฺโต ตํ ขาทิตฺวา รสํ สญฺชานิตฺวา ตาต นนุ อิมํ อสุกทีปเก อมฺพปกฺกนฺติ วตฺวา อาม ตาตาติ วุตฺเต ตาต เอตํ ทีปกํ คจฺฉนฺตา สุกา ทีฆมายุํ ปาเลนฺตา นาม นตฺถิ มา โข ตฺวํ ปน ตํ ทีปกํ อคมาสีติ อาห ฯ โส ตสฺส วจนํ อคฺคเหตฺวา อคมาสิเยว ฯ อเถกทิวสํ พหุํ อมฺพรสํ ปิวิตฺวา มาตาปิตูนํ อมฺพปกฺกํ อาทาย สมุทฺทมตฺถเกน อาคจฺฉนฺโต อติธาวตาย กิลนฺตกาโย นิทฺทาภิภูโต ฯ โส นิทฺทายนฺโตปิ อาคจฺฉเตว ฯ ตุณฺเฑน ปนสฺส คหิตํ อมฺพปกฺกํ ปติ ฯ โส อนุกฺกเมน อาคมนวีถึ ชหิตฺวา อุทเกเยว ปติ ฯ โส อุทกปิฏฺเฐเนวาคจฺฉนฺโต อุทเก โอสีทติ ฯ อถ นํ เอโก มจฺโฉ คเหตฺวา ขาทิ ฯ โพธิสตฺโต ตสฺมึ อาคมนเวลาย อนาคจฺฉนฺเตเยว สมุทฺเท ปติตฺวา มโต มญฺเญติ อญฺญาสิ ฯ อถสฺส มาตาปิตโรปิ อาหารํ อลภมานา สุสฺสิตฺวา มรึสุ ฯ