ตโต ตตฺเถว สํสีทิ อมตฺตญฺญู จ โส อหุ

ตสฺมา มตฺตญฺญุตา สาธุ โภชนสฺมึ อคิทฺธิตา

อมตฺตญฺญู หิ สีทนฺติ มตฺตญฺญูว น สีทเรติ ฯ

ตตฺถ ยาว โสติ ยาว โส วิหงฺคโม โภชนมตฺตมญฺญาสิ ฯ ตาว อทฺธานมาปาทีติ ตตฺตกํ กาลํ ชีวิตทฺธานํ อาปาทิ อายุํ วินฺทิ ฯ มาตรญฺจาติ เทสนาสีสมตฺตเมตํ ฯ มาตาปิตโร จ อโปสยีติ อตฺโถ ฯ ยโต จ โขติ ยสฺมึ จ โข กาเล ฯ โภชนํ อชฺฌวาหรีติ อมฺพรสํ อชฺโฌหริ ฯ ตโตติ ตสฺมึ กาเล ฯ ตตฺเถว สํสีทีติ ตสฺมึ สมุทฺเทเยว โอสีทิ นิมฺมุชฺชิ มจฺฉโภชนตฺตํ อาปชฺชิ ฯ ตสฺมา มตฺตญฺญุตา สาธูติ ยสฺมา โภชเน อมตฺตญฺญู สุโก สมุทฺเท โอสีทิตฺวา มโต ตสฺมา โภชนสฺมึ อคิทฺธิตาสงฺขาตา มตฺตญฺญุตา สาธุ ปมาณชานนํ สุนฺทรนฺติ อตฺโถ ฯ อถวา ฯ ปฏิสงฺขา โยนิโส อาหารํ อาหาเรติ เนว ทวาย น มทาย ฯเปฯ ผาสุวิหาโร จาติ