กนฺตาเร ปุตฺตมํสํว อกฺขสฺสพฺภญฺชนํ ยถา

เอวํ อาหาริ อาหารํ ยาปนตฺถาย อมุจฺฉิโตติ เอวํ วณฺณิตา อคิทฺธิตาปิ สาธุ ฯ ปาลิยํ ปน อคิทฺธิมาติ ลิขิตํ ฯ ตโต อยํ อฏฺฐกถาปาโฐ สุนฺทรตโร ฯ อมตฺตญฺญู หิ สีทนฺตีติ โภชเน ปมาณํ อชานนฺตา หิ รสตณฺหาวเสน ปาปกมฺมํ กตฺวา จตูสุ อปาเยสุ สีทนฺติ ฯ มตฺตญฺญูว น สีทเรติ เย ปน โภชเน ปมาณํ ชานนฺติ เต ทิฏฺฐธมฺเมปิ สมฺปราเยปิ น สีทนฺตีติ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน พหู โสตาปนฺนาปิ สกทาคามิโนปิ อนาคามิโนปิ อรหนฺโตปิ อเหสุํ ฯ ตทา โภชเน อมตฺตญฺญู ภิกฺขุ สุกราชปุตฺโต อโหสิ ฯ สุกราชา ปน อหเมวาติ ฯ

สุกชาตกํ ปญฺจมํ