นายํ ฆรานํ กุสโล โลโล อยํ วลีมุโข

กตํ กตํ โข ปทูเสยฺย เอวํธมฺมมิทํ กุลนฺติ ฯ

ตตฺถ นายํ ฆรานํ กุสโลติ อยํ สตฺโต น ฆรานํ กุสโล ฆรานํ วิจาเรตุํ วา กาเรตุํ วา เฉโก น โหติ ฯ โลโลติ โลลชาติโก ฯ วลีมุโขติ วลิโย มุเข อสฺสาติ วลีมุโข ฯ เอวํธมฺมมิทํ กุลนฺติ อิทํ มกฺกฏกุลํ นาม กตํ ทูเสตพฺพํ วินาเสตพฺพนฺติ เอวํสภาวํ ฯ

อมจฺจา เอวํ ภวิสฺสติ เทวาติ ตํ อปเนตฺวา เอกาหทฺวีหจฺจเยน ปุน ตเมว อลงฺกริตฺวา วินิจฺฉยฏฺฐานํ อาเนตฺวา อยํ เทว ปิตุ มหาราชสฺส กาเล วินิจฺฉยามจฺโจ วินิจฺฉยสุตฺตมสฺส สุปฺปวตฺตติ อิมํ สงฺคณฺหิตฺวา วินิจฺฉยกมฺมํ วิจาเรตุํ วฏฺฏตีติ อาหํสุ ฯ กุมาโร ตํ โอโลเกตฺวา จิตฺตวโต สมฺปนฺนมนุสฺสสฺส โลมํ นาม เอวรูปํ น โหติ อยมฺปิ นิจิตฺตโก วานโร วินิจฺฉยกมฺมํ กาตุํ น สกฺขิสฺสตีติ ญตฺวา ทุติยํ คาถมาห