อนุกมฺปํ กริตฺวา เปมํ อุปฺปาเทตฺวา ฯ วิวนสฺมีติ ปานียรหิเต อรญฺเญ ฯ โฆเรติ ทารุเณ ฯ ปสารยิ กิจฺฉคตสฺส ปาณินฺติ นิสฺเสณึ พนฺธิตฺวา กูปํ โอตริตฺวา ทุกฺขิตสฺส มยฺหํ อุตฺตรณตฺถาย วิริยปฏิสํยุตฺตํ หตฺถํ ปสาเรสิ ฯ เตนุทฺธตารึ ทุขสมฺปเรโตติ เตน การเณนมฺหิ ทุกฺขปริโตปิ ตมฺหา กูปา อุตฺติณฺโณ ฯ เอตสฺส กิจฺเฉน อิธานุปตฺโตติ อหํ เอตสฺส ตาปสสฺส กิจฺเฉน เอเตน กตสฺส กิจฺฉสฺสานุภาเวน อิธานุปฺปตฺโต ฯ เวยฺยาสิโน วีสยาติ เวยฺยาสิ วุจฺจติ ยโม ตสฺส วิสโย ฯ ชีวโลเกติ มนุสฺสโลเก ฯ อหํ หิ อิมสฺมึ ชีวโลเก ฐิโตว ยมวิสยํ มจฺจุวิสยํ ปรโลกํ คโต นาม อโหสึ โสมฺหิ เอตสฺส การณา ตโต ปุน อิธาคโตติ วุตฺตํ โหติ ฯ ลาภารโหติ ลาภสฺส อรโห จตุปจฺจยลาภสฺส อนุจฺฉวิโก ฯ เทถสฺส โภคนฺติ เอเตน ปริภุญฺชิตพฺพํ จตุปจฺจยสมณปริกฺขารสงฺขาตํ โภคํ เอตสฺส เทถ ฯ ยชิตญฺจ ยญฺญนฺติ ตฺวญฺจ อมจฺจา จ นาครา จาติ สพฺเพปิ ตุมฺเห เอตสฺส โภคญฺจ เทถ ยญฺญญฺจ ยชถ ฯ ตสฺส หิ ทิยฺยมาโน เทยฺยธมฺโม เตน ภุญฺชิตพฺพตฺตา โภโค โหติ อิตเรสํ ทานยญฺญตฺตา ยญฺญํ ฯ เตนาห เทถสฺส โภคํ ยชิตญฺจ ยญฺญนฺติ ฯ

เอวํ รญฺญา คคณตเล จนฺทํ อุฏฺฐาเปนฺเตน วิย โพธิสตฺตสฺส คุเณ ปกาสิเต ตสฺส คุโณ สพฺพตฺถกเมว ปากโฏ ชาโต ฯ อติเรกตโร จสฺส ลาภสกฺกาโร อุทปาทิ ฯ ตโต ปฏฺฐาย อุปราชา วา อมจฺจา วา อญฺโญ วา โกจิ กิญฺจิ ราชานํ วตฺตุํ น วิสหิ ฯ ราชา โพธิสตฺตสฺส โอวาเท ฐตฺวา ทานาทีนิ ปุญฺญานิ กตฺวา สคฺคปูรํ ปูเรสิ ฯ โพธิสตฺโตปิ อภิญฺญา จ สมาปตฺติโย จ อุปฺปาเทตฺวา พฺรหฺมโลกปรายโน อโหสิ ฯ

สตฺถา โปราณกปณฺฑิตาปิ อุปการวเสน กรึสูติ อิมํ ธมฺมเทสนํ อาหริตฺวา ชาตกํ สโมธาเนสิ ตทา ราชา อานนฺโท อโหสิ ตาปโส ปน อหเมวาติ ฯ

ติริติวจฺฉชาตกํ นวมํ