กายสฺส เภทา สุคตึ วชนฺติ ตาติ ฯ

เอวํ สตฺถริ อิมา สตฺต ภริยา ทสฺเสนฺเตเยว สุชาตา โสตาปตฺติผเล ปติฏฺฐหิ ฯ สุชาเต ตฺวํ อิมาสํ สตฺตนฺนํ ภริยานํ กตราติ วุตฺเต สา ทาสีสมา อหํ ภนฺเตติ วตฺวา ตถาคตํ วนฺทิตฺวา ขมาเปสิ ฯ อิติ สตฺถา สุชาตํ ฆรสุณฺหํ เอโกวาเทเนว ทเมตฺวา กตภตฺตกิจฺโจ เชตวนํ คนฺตฺวา ภิกฺขุสงฺเฆน วตฺเต ทสฺสิเต คนฺธกุฏึ ปาวิสิ ฯ ธมฺมสภายมฺปิ โข ภิกฺขู สตฺถุ คุณกถํ สมุฏฺฐาเปสุํ อาวุโส เอโกวาเทเนว สตฺถา สุชาตํ ฆรสุณฺหํ ทเมตฺวา โสตาปตฺติผเล ปติฏฺฐาเปสีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพเพปิ มยา สุชาตา เอโกวาเทเนว ทมิตาติ วตฺวา อตีตํ อาหริ ฯ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส อคฺคมเหสิยา กุจฺฉิมฺหิ นิพฺพตฺติตฺวา วยปฺปตฺโต ตกฺกสิลายํ สพฺพสิปฺปานิ อุคฺคณฺหิตฺวา ปิตุ อจฺจเยน รชฺเช ปติฏฺฐาย ธมฺเมน สเมน รชฺชํ กาเรสิ ฯ ตสฺส มาตา โกธนา อโหสิ จณฺฑา ผรุสา อกฺโกสิกปริภาสิกา ฯ โส มาตุ โอวาทํ ทาตุกาโม เอวเมว อวตฺถุกํ กเถตุํ น ยุตฺตนฺติ ตสฺสา อนุนยตฺถํ เอกํ อุปมํ โอโลเกนฺโต จรติ ฯ อเถกทิวสํ อุยฺยานํ อคมาสิ ฯ มาตาปิ ปุตฺเตน สทฺธิญฺเญว อคมาสิ ฯ อถ อนฺตรามคฺเค กิกีสกุโณ วิรวิ ฯ โพธิสตฺตสฺส ปริสา จ ตํ สทฺทํ สุตฺวา กณฺเณ ปิทหิตฺวา อมฺโภ จณฺฑวาเจ ผรุสวาเจ มา สทฺทมกาสีติ อาห ฯ โพธิสตฺเต ปน นาฏกปริวุเต มาตรา สทฺธึ อุยฺยานํ วิจรนฺเต เอกสฺมึ สุปุปฺผิเต สาลรุกฺเข นิลีนา เอกา โกกิลา มธุเรน สเรน วสฺสิ ฯ มหาชโน ตสฺสา สเรน สมฺมตฺโต หุตฺวา อญฺชลึ ปคฺคเหตฺวา สณฺหวาเจ สขิลวาเจ มุทุวาเจ วสฺส วสฺสาติ คีวํ อุกฺขิปิตฺวา โอหิตโสโต โอโลเกนฺโต อฏฺฐาสิ ฯ อถ โพธิสตฺโต ตานิ เทฺว การณานิ วิทิตฺวา อิทานิ มาตรํ สญฺญาเปตุํ สกฺขิสฺสามีติ จินฺเตตฺวา อมฺม อนฺตรามคฺเค กิกีสทฺทํ สุตฺวา มหาชโน มา สทฺทมกาสีติ กณฺเณ ปิทหิ ผรุสวาจา นาม น กสฺสจิ ปิยาติ วตฺวา อิมา คาถา อโวจ

น หิ วณฺเณน สมฺปนฺนา มญฺชุกา ปิยทสฺสนา