อตฺถํ ธมฺมญฺจ ทีเปติ มธุรนฺตสฺส ภาสิตนฺติ ฯ

ตาสํ อยมตฺโถ อมฺม อิเม สตฺตา ปิยงฺคุสามาทินา สรีรวณฺเณน สมฺปนฺนา กถานิคฺโฆสสฺส มธุรตาย มญฺชุกา อภิรูปตาย ปิยทสฺสนา สมานา อนฺตมโส มาตาปิตโร อกฺโกสปริภาสาทิ- วเสน ปวตฺตาย ขรวาจาย สมนฺนาคตตฺตา ขรวาจา อิมสฺมิญฺจ โลเก ปรสฺมิญฺจ โลเก ปิยา นาม น โหนฺติ อมฺม อนฺตรามคฺเค ขรวาจา กิกี วิย สณฺหภาณิโน ปน มฏฺฐาย มธุราย วาจาย สมนฺนาคตา วิรูปา ปิยา โหนฺติ เตน ตํ วทามิ นนุ ปสฺสสิ อิมํ กาฬึ ทุพฺพณฺณํ สรีรวณฺณโตปิ กาฬตเรหิ ติลเกหิ อาหตํ โกกิลํ สา จ เอวํ ทุพฺพณฺณา สมานาปิ สณฺหวาเจน พหุนฺนํ ปาณีนํ ปิยา ชาตา อิติ ยสฺมา ขรวาจา สตฺตา โลเก มาตา- ปิตูนมฺปิ อปฺปิยา ตสฺมา พหุชนสฺส ปิยภาวํ อิจฺฉนฺโต โปโส สขิลวาโจ สณฺหวาโจ มฏฺฐวาโจ มธุรวาโจ มุทุวาโจ อสฺส ปญฺญาสงฺขาตาย มนฺตาย ปริจฺฉินฺทิตฺวา วทนโต มนฺตภาณี วินา อุทฺธจฺเจน ปมาณยุตฺตสฺเสว กถนโต อนุทฺธโต โย หิ เอวรูโป อตฺถญฺจ ธมฺมญฺจ ทีเปติ ตสฺส ภาสิตํ การณนิสฺสิตํ กตฺวา ปรํ อโกเปตฺวา กถิตตฺตา มธุรนฺติ ฯ

เอวํ โพธิสตฺโต อิมาหิ ตีหิ คาถาหิ ธมฺมํ มาตุ เทเสตฺวา มาตรํ สญฺญาเปสิ ฯ สา ตโต ปฏฺฐาย อาจารสมฺปนฺนา อโหสิ ฯ โพธิสตฺโต หิ มาตรํ เอโกวาเทเนว นิพฺพิเสวนํ กตฺวา ยถากมฺมํ คโต ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา พาราณสีรญฺโญ มาตา สุชาตา อโหสิ ราชา ปน อหเมวาติ ฯ