ตตฺถ เยน มิตฺเตน สํสคฺคาติ เยน ปาปมิตฺเตน สทฺธึ สํสคฺคเหตุ สํสคฺคการณา ทสฺสนสํสคฺโค สวนสํสคฺโค กายสํสคฺโค สมุลฺลาปสํสคฺโค ปริโภคสํสคฺโค จาติ อิมสฺส ปญฺจวิธสฺส สํสคฺคสฺส กตตฺตาติ อตฺโถ ฯ โยคกฺเขโมติ กายจิตฺตสุขํ ฯ ตํ หิ ทุกฺขโยคโต เขมตฺตา อิธ โยคกฺเขโมติ อธิปฺเปตํ ฯ วิหียตีติ ปริหายติ ฯ ปุพฺเพวชฺฌาภวนฺตสฺส รกฺเข อกฺขึว ปณฺฑิโตติ ตสฺส ปาปมิตฺตสฺส อชฺฌาภวํ เตน อภิภวิตพฺพํ อตฺตโน ลาภยสชีวิตํ ยถา นํ โส น อชฺฌาภวติ ตถา ปฐมตรเมว อตฺตโน อกฺขึ วิย ปณฺฑิโต ปุริโส รกฺเขยฺย ฯ ทุติยคาถาย ฯ เยนาติ เยน กลฺยาณมิตฺเตน สห สํสคฺคเหตุ สํสคฺคการณา ฯ โยคกฺเขโม ปวฑฺฒตีติ กายจิตฺตสุขํ วฑฺฒติ ฯ กเรยฺยตฺตสมํ วุตฺตินฺติ ตสฺส กลฺยาณมิตฺตสฺส สพฺพกิจฺเจสุ ปณฺฑิโต ปุริโส ยถา อตฺตโน ชีวิตวุตฺติญฺจ อุปโภคปริโภควุตฺติญฺจ กโรติ เอวเมว สพฺพํ กเรยฺย อธิการมฺปิ กเรยฺย หีนํ ปน น กเรยฺยาติ ฯ

เอวํ โพธิสตฺเตน การเณ กถิเตปิ สา พาลเทวตา อนุปธาเรตฺวาว เอกทิวสํ เภรวรูปารมฺมณํ ทสฺเสตฺวา เต สีหพฺยคฺเฆ ปลาเปสิ ฯ มนุสฺสา เตสํ ปทวลญฺชํ อทิสฺวา สีหพฺยคฺฆา อญฺญํ วนสณฺฑํ คตาติ ญตฺวา วนสณฺฑสฺส เอกปสฺสํ ฉินฺทึสุ ฯ เทวตา โพธิสตฺตํ อุปสงฺกมิตฺวา อหํ สมฺม ตว วจนํ อกตฺวา เต ปลาเปสึ อิทานิ เตสํ คตภาวํ ญตฺวา มนุสฺสา วนสณฺฑํ ฉินฺทนฺติ กินฺนุโข กตฺตพฺพนฺติ วตฺวา อิทานิ เต อสุกวนสณฺเฑ นาม วสนฺติ คนฺตฺวา เต อาเนหีติ วุตฺตา ตตฺถ คนฺตฺวา เตสํ ปุรโต ฐตฺวา อญฺชลึ ปคฺคยฺห ตติยํ คาถมาห

เอถ พฺยคฺฆา นิวตฺตวฺโห ปจฺจุเปถ มหาวนํ

มา โน วนํ ฉินฺทิ นิพฺยคฺฆา พฺยคฺฆา มาเหสุ นิพฺพนาติ ฯ