ตตฺถ หิเตภีติ หิตํ วุฑฺฒึ อิจฺฉมาเนหิ ฯ วจนํ วุตฺโตติ หิตสุขาวหํ โอวาทานุสาสนึ วุตฺโต ฯ ปฏิคฺคณฺหติ วามโตติ

โอวาทํ อคฺคณฺหนฺโต อยํ เม น อตฺถาวโห โหติ อนตฺถาวโห เม อยนฺติ คณฺหนฺโต วามโต ปฏิคฺคณฺหติ นาม ฯ เย จ โข นนฺติ เย จ โข ตํ อตฺตโน คาหํ คเหตฺวา ฐิตํ ปุคฺคลํ อธิกรณํ คเหตฺวา ฐิเตหิ นาม ตุมฺหาทิเสหิ ภวิตพฺพนฺติ วณฺเณนฺติ ฯ ภยา อุกฺกํสยนฺติ วาติ อิมสฺส คาหสฺส วิสชฺชนปจฺจยา ตุมฺหากํ อิทญฺจ ภยํ อุปฺปชฺชิสฺสติ มา วิสชฺชยิตฺถ น เอเต พาหุสจฺจกุลปริวาราทีหิ ตุมฺเห สมฺปาปุณนฺตีติ เอวํ วิสชฺชนปจฺจยา ภยํ ทสฺเสตฺวา อุกฺขิปนฺติ ฯ ตํ หิ โส มญฺญเต มิตฺตนฺติ เย เอวรูปา โหนฺติ เตสุ ยํ กิญฺจิ โส เอกจฺโจ พาลปุคฺคโล อตฺตโน พาลตาย มิตฺตํ มญฺญติ อยํ เม อตฺถกาโม มิตฺโตติ มญฺญติ ฯ สตปตฺตํว มาณโวติ ยถา อนตฺถกามญฺเญว สตปตฺตํ โส มาณโว อตฺตโน พาลตาย อตฺถกาโมติ มญฺญิตฺถ ปณฺฑิโต ปน เอวรูปํ อนุปฺปิยภาณึ มิตฺโตติ อคฺคเหตฺวา ทูรโตว นํ วิวชฺเชติ ฯ เตน วุตฺตํ

อญฺญทตฺถุหโร มิตฺโต โย จ มิตฺโต วจีปโร

อนุปฺปิยญฺจ โย อาห อปาเยสุ จ โย สขา