ภตฺตุรตฺเถ ปรกฺกนฺโต ยํ ฐานมธิคจฺฉติ

สูโร อตฺตปริจฺจาคี ลภมาโน ภวามหนฺติ ฯ

ตตฺถ ภตฺตุรตฺเถติ ภตฺตา วุจฺจติ ภตฺตาทีหิ ภรณกโปสโก ปิตา มาตา สามิโก จ อิติ ติวิธสฺสาปิ ตสฺส ภตฺตุ อตฺถาย ฯ ปรกฺกนฺโตติ ปรกฺกมํ กโรนฺโต วายมนฺโต ฯ ยํ ฐานมธิคจฺฉตีติ ยํ สุขการณํ ยสํ วา ลาภํ วา สคฺคสมฺปตฺตึ วา อธิคจฺฉติ ฯ สูโรติ อภีรุ วิกฺกมสมฺปนฺโน ฯ อตฺตปริจฺจาคีติ กาเย จ ชีวิเต จ นิรเปกฺโข หุตฺวา ตสฺส ติวิธสฺสาปิ ภตฺตุ อตฺเถ อตฺตานํ ปริจฺจชนฺโต ฯ ลภมาโน ภวามหนฺติ ยํ โส เอวรูโป สูโร เทวสมฺปตฺตึ วา มนุสฺสสมฺปตฺตึ วา ลภติ อหมฺปิ ตํ ลภมาโน ภวามิ ตสฺมา หาโสว เม เอตฺถ น ตาโส กึ ปน มํ ตุมฺเห ตาเสถาติ ฯ

เอวํ โส อิมาย คาถาย เตสํ ธมฺมํ เทเสสิ ฯ เต ตสฺส ธมฺมกถํ สุตฺวา ปสนฺนจิตฺตา ธมฺมิโก เอส น สกฺกา มาเรตุํ วิสชฺเชถ นนฺติ วตฺวา สุวโปตกํ วิสชฺเชตฺวา อมฺโภ สุวโปตก มุตฺโตสิ อมฺหากํ หตฺถโต โสตฺถินา คจฺฉาติ อาหํสุ ฯ มยฺหํ อาคมนํ มา ตุจฺฉํ กโรถ เทถ เม เอกํ อมฺพผลนฺติ ฯ สุวโปตก ตุยฺหํ เอกํ อมฺพผลํ ทาตุํ นาม น ภาโร อิมสฺมึ ปน รุกฺเข อมฺพานิ อาคนฺตฺวา คณิตานิ คณิตานิ เอกสฺมึ ผเล อสเมนฺเต อมฺหากํ ชีวิตํ นตฺถิ เวสฺสวเณน หิ กุชฺฌิตฺวา สกึ โอโลกิเต ตตฺตกปาเล ปกฺขิตฺตติลา วิย กุมฺภณฺฑสหสฺสํ ภิชฺชิตฺวา วิปฺปกีริยติ เตน เต ทาตุํ น สกฺโกม ลภมานฏฺฐานํ ปน อาจิกฺขิสฺสามาติ ฯ โยโกจิ เทตุํ สมตฺโถ ลภมานฏฺฐานํ อาจิกฺขถาติ ฯ เอตสฺส กาญฺจนปพฺพตชาลสฺส อนฺตเร โชติรโส นาม ตาปโส อคฺคึ ชูหมาโน กาญฺจนปนฺติยา นาม ปณฺณสาลายํ วสติ เวสฺสวณสฺส กุลุปโก เวสฺสวโณ จ ตสฺส นิวทฺธํ จตฺตาริ อมฺพผลานิ เปเสติ ตสฺส สนฺติกํ คจฺฉาติ ฯ โส สาธูติ สมฺปฏิจฺฉิตฺวา ตาปสสฺส สนฺติกํ คนฺตฺวา วนฺทิตฺวา เอกมนฺตํ นิสีทิ ฯ อถ นํ ตาปโส กุโต อาคโตสีติ ปุจฺฉิ ฯ พาราณสีรญฺโญ สนฺติกาติ ฯ กิมตฺถาย อาคโตสีติ ฯ อมฺหากํ รญฺโญ เทวิยา อพฺภนฺตรมฺพปกฺเก โทหโฬ อุปฺปนฺโน ตทตฺถาย อาคโตมฺหิ รกฺขสา ปน เม สยํ อพฺภนฺตรมฺพปกฺกํ อทตฺวา ตุมฺหากํ สนฺติกํ เปเสสุนฺติ ฯ เตนหิ นิสีท ลภิสฺสสีติ ฯ อถสฺส เวสฺสวโณ จตฺตาริ ผลานิ เปเสสิ ฯ ตาปโส ตโต เทฺว ปริภุญฺชิ ฯ เอกํ สุวโปตกสฺส ขาทนตฺถาย อทาสิ ฯ เตน ตสฺมึ ขาทิเต เอกผลํ สิกฺกาย ปกฺขิปิตฺวา สุวโปตกสฺส คีวายํ ปฏิมุญฺจิตฺวา อิทานิ คจฺฉถาติ สุวโปตกํ วิสชฺเชสิ ฯ โส ตํ อาหริตฺวา เทวิยา อทาสิ ฯ สา ตํ ขาทิตฺวา โทหฬํ ปฏิปฺปสฺสมฺเภสิ ฯ ตโตนิทานํ โสมนสฺสปฺปตฺโต อโหสิ ๑- ฯ