อาคจฺฉนฺเต ทิสฺวา อตฺตโน ปริกฺขารํ อาทาย ปลายนฺโต เตหิ อนุพนฺธิโต ปริกฺขารํ ฉฑฺเฑตฺวา เวเคน อุทุมฺพรรุกฺขํ อภิรูหิ ฯ สูกรา อิทานิ สามิ ทุฏฺฐตาปโส ปลายิตฺวา รุกฺขํ อภิรุฬฺโหติ ฯ กึ ปน รุกฺขํ นามาติ ฯ อุทุมฺพรรุกฺขนฺติ ฯ โส สูกริโย อุทกํ อาหรนฺตุ สูกรโปตกา ขณนฺตุ ทีฆทาฐา สูกรา มูลานิ ฉินฺทนฺตุ เสสาปิ ปริวาเรตฺวา รกฺขนฺตูติ สํวิทหิตฺวา เตสุ ตถา กโรนฺเตสุ สยํ อุทุมฺพรสฺส อุชุคตมูลํ ผรสุนา ปหรนฺโต วิย เอกปฺปหารเมว กตฺวา อุทุมฺพรรุกฺขํ ปาเตสิ ฯ ปริวาเรตฺวา ฐิตสูกรา กูฏชฏิลํ ภูมิยํ ปาเตตฺวา ขณฺฑาขณฺฑิกํ กตฺวา ยาว อฏฺฐิโต ขาทิตฺวา วฑฺฒกิสูกรํ อุทุมฺพรรุกฺขกฺขนฺเธเยว นิสีทาเปตฺวา กูฏชฏิลสฺส ปริโภคสงฺเขน อุทกํ อาหราเปตฺวา อภิสิญฺจิตฺวา ราชานํ กรึสุ ฯ เอกญฺจ ตรุณีสูกรึ อภิสิญฺจิตฺวา ตสฺส อคฺคมเหสึ กรึสุ ฯ ตโต ปฏฺฐาย กิร ยาวชฺชตนา ราชาโน อุทุมฺพรภทฺทปีเฐ นิสีทาเปตฺวา ตีหิ สงฺเขหิ อภิสิญฺจนฺติ ฯ ตสฺมึ วนสณฺเฑ อธิวฏฺฐา เทวตา ตํ อจฺฉริยํ ทิสฺวา เอกสฺมึ ขนฺธวิฏเป สูกรานํ อภิมุขา หุตฺวา ตติยํ คาถมาห

นมตฺถุ สงฺฆานํ สมาคตานํ

ทิสฺวา สยํ สขฺยํ วทามิ อพฺภุตํ

พฺยคฺฆํ มิคา ยตฺถ ชินึสุ ทาฐิโน