ตสฺส สา จินฺตา จตุราสีติโยชนสหสฺสมตฺถเก ฐิตสฺส เทวรญฺโญ ปณฺฑุกมฺพลสิลาสนสฺส อุณฺหภาวํ ชเนสิ. สกฺโก "โก นุ โข มํ อิมสฺมา ฐานา จาเวตุกาโม"ติ ทิพฺพจกฺขุนา โอโลเกนฺโต มหาปุริสํ ทิสฺวา "สุรุจิ นาม พฺราหฺมโณ พุทฺธปฺปมุขํ ภิกฺขุสํฆํ นิมนฺเตตฺวา นิสีทนฏฺฐานตฺถาย จินฺเตสิ, มยาปิ ตตฺถ คนฺตฺวา ปุญฺญโกฏฺฐาสํ คเหตุํ วฏฺฏตี"ติ วฑฺฒกิวณฺณํ นิมฺมินิตฺวา วาสิผรสุหตฺโถ มหาปุริสสฺส ปุรโต ปาตุรโหสิ. โส "อตฺถิ นุ โข กสฺสจิ ภติยา กตฺตพฺพนฺ"ติ อาห. มหาปุริโส ตํ ทิสฺวา "กึ กมฺมํ กริสฺสสี"ติ อาห. "มม อชานนสิปฺปํ นาม นตฺถิ, เคหํ วา มณฺฑปํ วา โย ยํ กาเรติ, ตสฺส ตํ กาตุํ ชานามี"ติ. "เตนหิ มยฺหํ กมฺมํ อตฺถี"ติ. "กึ อยฺยา"ติ. "สฺวาตนาย เม โกฏิสตสหสฺสภิกฺขู นิมนฺติตา, เตสํ นิสีทนมณฺฑปํ กริสฺสสี"ติ. "อหํ นาม กเรยฺยํ, สเจ เม ภตึ ทาตุํ สกฺขิสฺสถา"ติ. "สกฺขิสฺสามิ ตาตา"ติ. "สาธุ กริสฺสามี"ติ คนฺตฺวา เอกํ ปเทสํ โอโลเกสิ. ทฺวาทสเตรสโยชนปฺปมาโณ ปเทโส กสิณมณฺฑลํ วิย สมตโล อโหสิ. โส "เอตฺตเก ฐาเน สตฺตรตนมโย มณฺฑโป อุฏฺฐหตู"ติ จินฺเตตฺวา โอโลเกสิ, ตาวเทว ปฐวึ ภินฺทิตฺวา มณฺฑโป อุฏฺฐหิ, ตสฺส โสวณฺณมเยสุ ถมฺเภสุ รชตมยา ฆฏกา อเหสุํ, รชตมเยสุ โสวณฺณมยา, มณิตฺถมฺเภสุ ปวาฬมยา, ปวาฬมเยสุ ถมฺเภสุ มณิมยา, สตฺตรตนมเยสุ สตฺตรตนมยาว ฆฏกา อเหสุํ. ตโต "มณฺฑปสฺส อนฺตรนฺตเรน กิงฺกิณิกชาลํ โอลมฺพตู"ติ โอโลเกสิ, สห โอโลกเนเนว กิงฺกิณิกชาลํ โอลมฺพิ, ยสฺส มนฺทวาเตริตสฺส ปญฺจงฺคิกสฺเสว ตุริยสฺส มธุรสทฺโท นิคฺคจฺฉติ, ทิพฺพสงฺคีตปฺปวตฺตนกาโล วิย โหติ. "อนฺตรนฺตรา คนฺธทามมาลาทามานิ โอลมฺพนฺตู"ติ จินฺเตสิ, คนฺธทามมาลาทามานิ โอลมฺพึสุ. "โกฏิสตสหสฺสสงฺขานํ ภิกฺขูนํ อาสนานิ จ อาธารกานิ จ ปฐวึ ภินฺทิตฺวา อุฏฺฐหนฺตู"ติ จินฺเตสิ, ตาวเทว อุฏฺฐหึสุ. "โกเณ โกเณ เอเกกา อุทกจาฏิโย อุฏฺฐหนฺตู"ติ จินฺเตสิ, อุทกจาฏิโย อุฏฺฐหึสุ.

เอตฺตกํ มาเปตฺวา พฺราหฺมณสฺส สนฺติกํ คนฺตฺวา "เอหิ อยฺย, ตว มณฺฑปํ โอโลเกตฺวา มยฺหํ ภตึ เทหี"ติ อาห. มหาปุริโส คนฺตฺวา มณฺฑปํ โอโลเกสิ, โอโลเกนฺตสฺเสวสฺส สกลสรีรํ ปญฺจวณฺณาย ปีติยา นิรนฺตรํ ผุฏฺฐํ อโหสิ. อถสฺส มณฺฑปํ โอโลกยโต เอตทโหสิ "นายํ มณฺฑโป มนุสฺสภูเตน กโต, มยฺหํ ปน อชฺฌาสยํ มยฺหํ คุณํ อาคมฺม อทฺธา สกฺกสฺส ภวนํ อุณฺหํ อโหสิ, ตโต สกฺเกน เทวรญฺญา อยํ มณฺฑโป กโต ภวิสฺสตี"ติ. "น โข ปน เม ยุตฺตํ เอวรูเป มณฺฑเป เอกทิวสํเยว ทานํ ทาตุํ, สตฺตาหํ ทสฺสามี"ติ จินฺเตสิ.