สพฺพตฺถ กตปุญฺญสฺส อติจฺจญฺเญว ปาณิโน

อุปฺปชฺชนฺติ พหู โภคา อปินายตเนสุปีติ ฯ

ตตฺถ ยํ อุสฺสุกฺกาติ ยํ ธนํ สงฺฆริตุํ อุสฺสุกฺกมาปนฺนา ฉนฺทชาตา กิจฺเจน พหุธนํ สงฺฆรนฺติ ฯ เย อุสฺสุกฺกาติ วา ปาโฐ ฯ เย ปุริสา ธนสํหรเณ อุสฺสุกฺกา หตฺถิสิปฺปาทิวเสน สิปฺปวนฺโต วา อสิปฺปา วา อนฺตมโส เวตฺตเนน กมฺมํ กตฺวา พหุธนํ สงฺฆรนฺตีติ อตฺโถ ฯ ลกฺขิกา ตานิ ภุญฺชเรติ ตานิ พหุํ ธนนฺติ วุตฺตานิ ธนานิ อญฺเญ ปุญฺญวนฺโต ปุริสา อตฺตโน ปุญฺญผลํ ปริภุญฺชนฺตา กิญฺจิ กมฺมํ อกตฺวาปิ ปริภุญฺชนฺติ ฯ อติจฺจญฺเญว ปาณิโนติ อติจฺจ อญฺเญเอว ปาณิโน ฯ เอตฺเถว เอวกาโร ปุริมปเทน โยเชตพฺโพ สพฺพตฺเถว กตปุญฺญสฺส อญฺเญ อกตปุญฺเญ สตฺเต อติกฺกมิตฺวาติ อตฺโถ ฯ อปินายตเนสุปีติ อปิ อนายตเนสุปิ อรตนากเรสุ รตนานิ อสุวณฺณายตนาทีสุ สุวณฺณาทีนิ อหตฺถายตนาทีสุ หตฺถิอาทโยติ สวิญฺญาณกอวิญฺญาณกา พหู โภคา อุปฺปชฺชนฺติ ฯ ตตฺถ มุตฺตามณิอาทีนํ อนากเรสุ อุปฺปตฺติยํ หิ ทุฏฺฐคามณิอภยมหาราชสฺส วตฺถุ กเถตพฺพํ ฯ

สตฺถา ปน อิมํ คาถํ วตฺวา คหปติ อิเมสํ สตฺตานํ ปุญฺญสทิสํ อญฺญํ อายตนํ นาม นตฺถิ ปุญฺญวนฺตานํ หิ อนากเรสุปิ รตนานิ อุปฺปชฺชนฺติเยวาติ วตฺวา อิมํ ธมฺมํ เทเสติ