นานุมฺมตฺโต นาปิสุโณ นานโฏ นากุตูหโล

มุฬฺเหสุ ลภเต ลาภํ เอสา เต อนุสาสนีติ ฯ

ตตฺถ นานุมฺมตฺโตติ น อนุมฺมตฺโต ฯ อิทํ วุตฺตํ โหติ ยถา อุมฺมตฺตโก นาม อิตฺถีปุริสทารเก ทิสฺวา เตสํ วตฺถาลงฺการาทีนิ วิลุมฺปติ ตโต ตโต มจฺฉมํสปูวาทีนิ พลกฺกาเรน คเหตฺวา ขาทติ เอวเมว โย คิหีภูโต อชฺฌตฺตพหิทฺธาสมุฏฺฐานํ หิโรตฺตปฺปํ ปหาย กุสลากุสลํ อคเณตฺวา นิรยภยํ อภายนฺโต โลภาภิภูโต ปริยาทิณฺณจิตฺโต กาเมสุ ปมตฺโต สนฺธิจฺเฉทาทีนิ สาหสิกกมฺมานิ กโรติ ปพฺพชิโตปิ หิโรตฺตปฺปํ ปหาย กุสลากุสลํ อคเณตฺวา นิรยภยํ อภายนฺโต สตฺถารา ปญฺญตฺตํ สิกฺขาปทํ มทฺทนฺโต โลเภนาภิภูโต ปริยาทิณฺณจิตฺโต จีวราทิมตฺตํ นิสฺสาย อตฺตโน สามญฺญํ วิชหิตฺวา ปมตฺโตว เวชฺชกมฺมทูตกมฺมาทีนิ กโรติ เวฬุทานาทีนิ นิสฺสาย ชีวิตํ กปฺเปสิ อยํ อนุมฺมตฺโตปิ อุมฺมตฺตสทิสตฺตา อุมฺมตฺโต นาม เอวรูปสฺส ขิปฺปํ ลาโภ อุปฺปชฺชติ โย ปน เอวํ อนุมฺมตฺโต ลชฺชี กุกฺกุจฺจโก เอส มุฬฺเหสุ อปณฺฑิเตสุ ปุริเสสุ ลาภํ น ลภติ ตสฺมา ลาภตฺถิเกน อุมฺมตฺตเกน วิย ภวิตพฺพนฺติ ฯ นาปิสุโณติ เอตฺถาปิ โย ปน ปิสุโณ โหติ อสุเกน อิทํ นาม กตนฺติ ราชกุเล เปสุญฺญํ อุปสํหรติ โส อญฺเญสํ ยสํ อจฺฉินฺทิตฺวา อตฺตโน คณฺหติ ราชาโนปิ นํ อยํ อมฺเหสุ สสิเนโหติ อุจฺจฏฺฐาเน ฐเปนฺติ อมจฺจาทโยปิสฺส อยํ โน ราชกุเล ปริภินฺเทยฺยาติ ภเยน ทาตพฺพํ มญฺญนฺติ เอวํ เอตรหิ ปิสุณสฺส ลาโภ อุปฺปชฺชติ โย ปน อปิสุโณ โส น มุฬฺเหสุ ลาภํ ลภตีติ เอวมตฺโถ เวทิตพฺโพ ฯ นานโฏติ ลาภํ อุปฺปาเทนฺเตน นเฏน วิย ภวิตพฺพํ ฯ ยถา นฏา หิโรตฺตปฺปํ ปหาย นจฺจคีตวาทิเตหิ กีฬํ กตฺวา ธนํ สํหรนฺติ เอวเมว ลาภตฺถิเกน หิโรตฺตปฺปํ ภินฺทิตฺวา อิตฺถีปุริสทารกทาริกานํ โสณฺฑสหาเยน วิย หุตฺวา นานปฺปการํ เกฬึ กโรนฺเตน วิจริตพฺพํ โย เอวมนโฏ โส น มุฬฺเหสุ ลาภํ ลภติ ฯ นากุตูหโลติ กุตูหโล นาม วิกิณฺณวาโจ ฯ ราชาโน หิ อมจฺจปริวุตา อมจฺเจ ปุจฺฉนฺติ อสุกฏฺฐาเน กิร มนุสฺโส มาริโต ฆรํ วิลุตฺตํ ปเรสํ ทารา ปธํสิตาติ สุยฺยติ เกสํ นุโข อิทํ กมฺมนฺติ ฯ ตตฺถ เสเสสุ อกถิเตสุเยว โย อุฏฺฐหิตฺวา อสุโก จ อสุโก จ นามาติ วทติ อยํ กุตูหโล นาม ฯ ราชาโน ตสฺส วจเนน เต ปุริเส ปริเยเสตฺวา นิเสเธตฺวา อิมํ นิสฺสาย โน นครํ นิจฺโจรํ ชาตนฺติ ตสฺส มหนฺตํ ยสํ เทนฺติ ฯ เสสาปิ ชนา อยํ โน ราชปุริเสหิ ปุฏฺโฐ สุยุตฺตทุยุตฺตํ กเถยฺยาติ ภเยน ตสฺเสว ธนํ เทนฺติ ฯ เอวํ กุตูหลสฺส ลาโภ อุปฺปชฺชติ ฯ โย ปน อกุตูหโล เอส น มุฬฺเหสุ ลาภํ ลภติ ฯ เอสา เต อนุสาสนีติ ยา เอสา อมฺหากํ สนฺตกา ตุยฺหํ ลาภานุสิฏฺฐีติ ฯ