อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต กากโยนิยํ นิพฺพตฺเตตฺวา วยปฺปตฺโต อสีติยา กากสหสฺสานํ เชฏฺฐโก สุปตฺโต นาม ราชา อโหสิ ฯ อคฺคมเหสี ปนสฺส สุปสฺสา ๑- นาม กากี อโหสิ ฯ เสนาปติ สุมุโข นาม ฯ โส อสีติยา กากสหสฺเสหิ ปริวุโต พาราณสึ อุปนิสฺสาย วสิ ฯ โส เอกทิวสํ สุปสฺสํ อาทาย โคจรํ ปริเยสมาโน พาราณสีรญฺโญ มหานสมตฺถเกน อคมาสิ ฯ สูโท รญฺโญ นานามจฺฉมํสวิกติปริวารํ โภชนํ สมฺปาเทตฺวา โถกํ ภาชนานิ วิวริตฺวา อุสุมํ ปลาเปนฺโต อฏฺฐาสิ ฯ สุปสฺสา มจฺฉมํสคนฺธํ ฆายิตฺวา ราชโภชนํ ภุญฺชิตุกามา หุตฺวา ตํทิวสํ อกเถตฺวา ทุติยทิวเส เอหิ ภทฺเท โคจราย

คมิสฺสามาติ วุตฺตา ตุมฺเห คจฺฉถ มยฺหํ เอโก โทหโฬ อตฺถีติ วตฺวา กึโทหโฬติ วุตฺเต พาราณสีรญฺโญ โภชนํ ภุญฺชิตุกามมฺหิ น โข ปน สกฺกา มยา ตํ ลทฺธุํ ตสฺมา ชีวิตํ ปริจฺจชิสฺสามิ เทวาติ อาห ฯ โพธิสตฺโต จินฺตยมาโน นิสีทิ ฯ สุมุโข อาคนฺตฺวา กึ มหาราช อนตฺตมโนสีติ ปุจฺฉิ ฯ ราชา ตมตฺถํ อาโรเจสิ ฯ เสนาปติ มา จินฺตยิ มหาราชาติ เต อุโภปิ อสฺสาเสตฺวา อชฺช ตุมฺเห อิเธว โหถ มยํ ภตฺตํ อาหริสฺสามาติ วตฺวา ปกฺกามิ ฯ โส กาเก สนฺนิปาเตตฺวา ตํ การณํ กเถตฺวา เอถ ภตฺตํ อาหริสฺสามาติ กาเกหิ สทฺธึ พาราณสึ ปวิสิตฺวา มหานสสฺสาวิทูเร กาเก วคฺเค วคฺเค กตฺวา ตสฺมึ ตสฺมึ ฐาเน อารกฺขณตฺถาย ฐเปตฺวา สยํ อฏฺฐหิ กากโยเธหิ สทฺธึ มหานสจฺฉทเน นิสีทิ ฯ รญฺโญ ภตฺตหรณกาลํ โอโลกยมาโน เต จ กาเก อาห อหํ รญฺโญ ภตฺเต อาหริยมาเน ภาชนานิ ปาเตสฺสามิ ภาชเนสุ ปน ปติเตสุ มยฺหํ ชีวิตํ นตฺถิ ตุมฺเห จตฺตาโร ชนา มุขปูรํ ภตฺตํ จตฺตาโร มจฺฉมํเส คเหตฺวา เนตฺวา สปชาปติกํ กากราชานํ โภเชถ กหํ เสนาปตีติ วุตฺเต ปจฺฉโต เอหิตีติ วเทยฺยาถาติ ฯ อถ สูโท รญฺโญ โภชนวิกตึ สมฺปาเทตฺวา ภาชนํ กาเชน คาหาเปตฺวา ราชกุลํ ปาวิสิ ฯ ตสฺส ราชงฺคณํ คตกาเล กากเสนาปติ กากานํ สญฺญํ ทตฺวา สยํ โอปติตฺวา ภตฺตหารกสฺส อุเร นิสีทิตฺวา นขปญฺชเรน ปหริตฺวา กณยคฺคสทิเสน ตุณฺเฑน นาสคฺคมสฺส อภิหนนฺโต อุฏฺฐาย ทฺวีหิ ปกฺขปาเทหิ มุขมสฺส ปิทหิ ฯ ราชา มหาตเล จงฺกมนฺโต มหาวาตปาเนน โอโลเกตฺวา ตํ กากสฺส กิริยํ ทิสฺวา ภตฺตหารกสฺส สทฺทํ ทตฺวา โภ ภตฺตหารก ภาชนานิ ฉฑฺเฑตฺวา กากเมว คณฺหาหีติ อาห ฯ โส ภาชนานิ ฉฑฺเฑตฺวา กากํ ทฬฺหํ คณฺหิ ฯ ราชาปิ ตํ อิโต เอหีติ อาห ฯ ตสฺมึ ขเณ เต กากา อาคนฺตฺวา อตฺตโน ปโหนกํ ภุญฺชิตฺวา เสสํ วุตฺตนิยาเมเนว คเหตฺวา อคมํสุ ฯ ตโต เสสา อาคนฺตฺวา เสสํ ภุญฺชึสุ ฯ เตปิ อฏฺฐ ชนา คนฺตฺวา ตํ ราชานํ สปชาปติกํ โภเชสุํ ฯ สุปสฺสาย โทหโฬ วูปสมิ ฯ ภตฺตหารโก กากํ รญฺโญ อุปเนสิ ฯ อถ นํ ราชา ปุจฺฉิ โภ กาก ตฺวํ มมญฺจ น ลชฺชิ ภตฺตหารกสฺส จ นาสํ ขณฺเฑสิ ภตฺตภาชนานิ จ ภินฺทิ อตฺตโน จ ชีวิตํ น รกฺขิ กสฺมา เอวรูปํ กมฺมํ อกาสีติ ฯ กาโก มหาราช อมฺหากํ ราชา พาราณสึ อุปนิสฺสาย วสติ อหมสฺส เสนาปติ ตสฺส สุปสฺสา นาม ภริยา โทหฬินี ตุมฺหากํ โภชนํ ภุญฺชิตุกามา ราชา ตสฺสา โทหฬํ มยฺหํ อาจิกฺขิ อหํ ตสฺเสว มม ชีวิตํ ปริจฺจชิตฺวา อาคโต อิทานิ เม ตสฺสา โภชนํ เปสิตํ มยฺหํ มโนรโถ มตฺถกํ ปตฺโต อิมินา การเณน มยา เอวรูปํ กตนฺติ ทีเปนฺโต อิมา คาถา อาห