โว กิญฺจิ ปุจฺฉามีติ ฯ ปุจฺฉ สามิ ชานนฺติโย กเถสฺสามาติ ฯ เถโร เอกํ นาม กินฺติ ปุจฺฉิ ฯ ตา น ชานึสุ ฯ เถโร วิสชฺเชสิ ฯ ตา อมฺหากํ สามิ ปราชโย ตุมฺหากํ ชโยติ อาหํสุ ฯ อิทานิ กึ กริสฺสถาติ ฯ อมฺหากํ มาตาปิตูหิ อยํ โอวาโท ทินฺโน สเจ โว คิหี วาทํ ภินฺทิสฺสติ ตสฺส ปชาปติโย ภเวยฺยาถ สเจ ปพฺพชิโต ตสฺส สนฺติเก ปพฺพเชยฺยาถาติ ปพฺพชฺชํ โน เทถาติ ฯ เถโร สาธูติ วตฺวา ตา อุปฺปลวณฺณาย เถริยา สนฺติเก ปพฺพาเชสิ ฯ สพฺพา นจิรสฺเสว อรหตฺตํ ปาปุณึสุ ฯ อเถกทิวสํ ภิกฺขู ธมฺมสภายํ กถํ สมุฏฺฐาเปสุํ อาวุโส สารีปุตฺตตฺเถโร จตุนฺนํ ปริพฺพาชิกานํ อวสฺสโย หุตฺวา สพฺพา อรหตฺตํ ปาเปสีติ ฯ สตฺถา อาคนฺตฺวา กายนุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปิ เอตาสํ อวสฺสโย อโหสิ อิทานิ ปน ปพฺพชฺชาภิเสกํ ทาเปสิ ปุพฺเพ ราชมเหสิฏฺฐาเน ฐเปสีติ วตฺวา อตีตํ อาหริ ฯ

อตีเต กาลิงฺครฏฺเฐ ทนฺตปุรนคเร กาลิงฺคราเช รชฺชํ กาเรนฺเต อสฺสกรฏฺเฐ โปตลนคเร ๑- อสฺสโก นาม รชฺชํ กาเรสิ ฯ กาลิงฺโค สมฺปนฺนพลพาหโน สยมฺปิ นาคพโล ปฏิโยธํ น ปสฺสติ ฯ โส ยุชฺฌิตุกาโม หุตฺวา อมจฺจานํ อาโรเจสิ อหํ ยุทฺธตฺถิโก ปฏิโยธํ ปน น ปสฺสามิ กึ กโรมาติ ฯ อมจฺจา อตฺเถโก มหาราช อุปาโย ธีตโร เต จตสฺโส อุตฺตมรูปธรา ตา ปสาเธตฺวา

ปฏิจฺฉนฺนยาเน นิสีทาเปตฺวา พลปริวุตา คามนิคมราชธานิโย จราเปถ โย ราชา อตฺตโน คเหตุกาโม ๑- ภวิสฺสติ เตน สทฺธึ ยุทฺธํ กริสฺสามาติ วทึสุ ฯ ราชา ตถา กาเรสิ ฯ ตาหิ คตคตฏฺฐาเน ราชาโน ภเยน ตาสํ นครํ ปวิสิตุํ น เทนฺติ ปณฺณาการํ เปเสตฺวา พหินคเรเยว วสาเปนฺติ ฯ เอวํ สกลชมฺพูทีปํ จริตฺวา อสฺสกรฏฺเฐ โปตลนครํ ปาปุณึสุ ฯ อสฺสกราชาปิ นครทฺวารานิ ปิทหาเปตฺวา ปณฺณาการํ เปเสสิ ฯ ตสฺส นนฺทเสโน ๒- นาม อมจฺโจ ปณฺฑิโต วิยตฺโต อุปายกุสโล ฯ โส จินฺเตสิ อิมา กิร กาลิงฺคราชธีตาโร สกลชมฺพูทีปํ จริตฺวา ปฏิโยธํ น ลภึสุ เอวํ สนฺเตปิ ชมฺพูทีโป ตุจฺโฉ นาม อโหสิ อหํ กาลิงฺเคน สห ยุชฺฌิสฺสามีติ ฯ โส นครทฺวารํ คนฺตฺวา โทวาริเก อามนฺเตตฺวา ตาสํ ทฺวารํ วิวราเปตุํ ปฐมํ คาถมาห