๒ นนฺทิเสโน ฯ ทสฺเสตฺวา ตุมฺเห มา ภายิตฺถ ยุทฺเธ สติ อหํ ชานิสฺสามิ อิมา อุตฺตมรูปธรา ราชธีตโร อคฺคมเหสิโย กโรถาติ ตาสํ อภิเสกํ ทาเปตฺวา ตาหิ สทฺธึ อาคตปุริเส คจฺฉถ ตุมฺเห ราชธีตานํ อสฺสกราเชน มเหสิฏฺฐาเน ฐปิตภาวํ ตุมฺหากํ รญฺโญ อาจิกฺขถาติ อุยฺโยเชสิ ฯ เต คนฺตฺวา อาโรเจสุํ ฯ กาลิงฺโค นห นูน โส มยฺหํ พลํ ชานาตีติ ตาวเทว มหติยา เสนาย นิกฺขมิ ฯ นนฺทเสโน ตสฺสาคมนํ ญตฺวา อตฺตโน กิร รชฺชสีมายเมว โหตุ มา อมฺหากํ รญฺโญ รชฺชสีมํ โอกฺกมตุ อุภินฺนํ รฏฺฐานํ อนฺตเร ยุทฺธํ ภวิสฺสตีติ สาสนํ เปเสสิ ฯ โส สาสนํ สุตฺวา อตฺตโน รชฺชปริยนฺเตว อฏฺฐาสิ ฯ อสฺสโกปิ อตฺตโน รชฺชปริยนฺเตเยว อฏฺฐาสิ ฯ

ตทา โพธิสตฺโต อิสิปพฺพชฺชํ ปพฺพชิตฺวา เตสํ ทฺวินฺนํ ราชูนํ อนฺตเร ปณฺณสาลายํ วสติ ฯ กาลิงฺโค สมณา นาม กิญฺจิ ชานนฺติ โก ชานาติ กึ ภวิสฺสติ กสฺส ชโย วา ปราชโย วา ภวิสฺสติ ตาปสํ ปุจฺฉิสฺสามีติ อญฺญาตกเวเสน โพธิสตฺตํ อุปสงฺกมิตฺวา วนฺทิตฺวา เอกมนฺตํ นิสีทิตฺวา ปฏิสนฺถารํ กตฺวา ภนฺเต กาลิงฺโค จ อสฺสโก จ ยุชฺฌิตุกามา อตฺตโน อตฺตโน รชฺชสีมายเมว ฐิตา เอเตสุ กสฺส ชโย กสฺส ปราชโย ภวิสฺสตีติ ปุจฺฉิ ฯ มหาปุญฺญ อหํ อสุกสฺส ชโย อสุกสฺส ปราชโยติ น ชานามิ สกฺโก ปน เทวราชา อิธาคจฺฉติ ตมหํ ปุจฺฉิตฺวา กเถสฺสามิ เสฺวว อาคจฺเฉยฺยาสีติ ฯ สกฺโก โพธิสตฺตสฺส อุปฏฺฐานํ อาคนฺตฺวา นิสีทิ ฯ อถ นํ โพธิสตฺโต ตมตฺถํ ปุจฺฉิ ฯ ภนฺเต กาลิงฺโค ชินิสฺสติ อสฺสโกว ปราชิสฺสติ อิทญฺจ ปุพฺพนิมิตฺตํ ปญฺญายิสฺสตีติ ฯ กาลิงฺโค ปุนทิวเส อาคนฺตฺวา ปุจฺฉิ ฯ โพธิสตฺโตปิสฺส อาจิกฺขิ ฯ โส กึ นาม ปุพฺพนิมิตฺตํ ภวิสฺสตีติ อปุจฺฉิตฺวาว อหํ กิร ชินิสฺสามีติ ตุฏฺฐิยา ปกฺกามิ ฯ สา กถา วิตฺถาริกา อโหสิ ฯ ตํ สุตฺวา อสฺสโก นนฺทเสนํ ปกฺโกสาเปตฺวา กาลิงฺโค กิร ชินิสฺสติ มยํ ปราชิสฺสาม กินฺนุโข กาตพฺพนฺติ อาห ฯ โส โก เอตํ มหาราช ชานาติ กสฺส ชโย วา ปราชโย วา ตุมฺเห มา จินฺตยิตฺถาติ ราชานํ อสฺสาเสตฺวา โพธิสตฺตํ อุปสงฺกมิตฺวา วนฺทิตฺวา เอกมนฺตํ นิสินฺโน ภนฺเต โก ชินิสฺสติ โก ปราชิสฺสตีติ ปุจฺฉิ ฯ กาลิงฺโค ชินิสฺสติ อสฺสโก ปราชิสฺสตีติ ฯ ภนฺเต ชินนฺตสฺส กึ ปุพฺพนิมิตฺตํ ภวิสฺสติ กึ ปราชินนฺตสฺสาติ ฯ มหาปุญฺญ ชินนฺตสฺส อารกฺขเทวตา สพฺพเสโต อุสโภ ภวิสฺสติ อิตรสฺส สพฺพกาฬโก อุภินฺนมฺปิ อารกฺขเทวตา ยุชฺฌิตฺวา ชยปราชยํ กริสฺสตีติ ฯ นนฺทเสโน ตํ สุตฺวา อุฏฺฐาย คนฺตฺวา รญฺโญ สหายา สหสฺสมตฺตา มหาโยธา เต คเหตฺวา อวิทูเร ปพฺพตํ อารุยฺห อมฺโภ อมฺหากํ รญฺโญ ชีวิตํ ทาตุํ สกฺขิสฺสถาติ ปุจฺฉิ ฯ อาม สกฺขิสฺสามาติ ฯ เตนหิ อิมสฺมึ ปปาเต ปตถาติ ฯ เต ปติตุกามา อเหสุํ ฯ อถ เน วาเรตฺวา อลํ เอตฺถ ปตเนน อมฺหากํ รญฺโญ ชีวิตํ ทาตุํ สุหทยา อนิวตฺติโน หุตฺวา ยุชฺฌถาติ อาห ฯ เต สมฺปฏิจฺฉึสุ ฯ อถ สงฺคาเม ปจฺจุปฏฺฐิเต กาลิงฺโค อหํ กิร ชินิสฺสามีติ โวสานมาปาทิ ฯ พลนิกายาปิสฺส อมฺหากํ กิร ชโยติ โวสานํ อาปชฺชิตฺวา สนฺนาหํ อกตฺวา ๑- วคฺควคฺคา หุตฺวา ยถารุจึ ปกฺกมึสุ วิริยกรณกาเล วิริยํ น กรึสุ ฯ อุโภปิ ราชาโน อสฺสํ อภิรูหิตฺวา ยุชฺฌิสฺสามาติ อญฺญมญฺญํ อุปสงฺกมึสุ ฯ อุภินฺนํ อารกฺขเทวตา ปุรโต คนฺตฺวา กาลิงฺคสฺส อารกฺขเทวตา สพฺพเสโต อุสโภ อโหสิ อิตรสฺส สพฺพกาฬโก ฯ เตปิ อญฺญมญฺญํ ยุชฺฌนาการํ ทสฺเสนฺตา อุปสงฺกมึสุ ฯ เต ปน อุสภา ทฺวินฺนํ ราชูนเมว ปญฺญายนฺติ น อญฺเญสํ ฯ นนฺทเสโน อสฺสกํ ปุจฺฉิ ปญฺญายติ เต มหาราช อารกฺขเทวตาติ ฯ อาม ปญฺญายตีติ ฯ เกนากาเรนาติ ฯ กาลิงฺคสฺส อารกฺขเทวตา สพฺพเสโต อุสโภ หุตฺวา ปญฺญายติ อมฺหากํ อารกฺขเทวตา สพฺพกาฬโก หุตฺวา ปญฺญายตีติ ฯ มหาราช ตุมฺเห มา ภายิตฺถ มยํ ชินิสฺสาม กาลิงฺโค ปราชิสฺสติ ตุมฺเห อสฺสปิฏฺฐิโต โอตริตฺวา อิมํ สตฺตึ คเหตฺวา สุสิกฺขิตํ สินฺธวํ อุทรปสฺเส พามหตฺเถน อุปฺปีเฬตฺวา อิมินา ปุริสสหสฺเสน สทฺธึ เวคสา คนฺตฺวา กาลิงฺคสฺส อารกฺขเทวตํ สตฺติปฺปหาเรน ปาเตถ ตโต มยํ สหสฺสมตฺตา สตฺติสหสฺเสน ปหริสฺสาม เอวํ กาลิงฺคสฺส อารกฺขเทวตา นสฺสิสฺสติ ตโต กาลิงฺโค ปราชิสฺสติ มยํ ชินิสฺสามาติ ฯ ราชา สาธูติ นนฺทเสเนน ทินฺนสญฺญาย คนฺตฺวา สตฺติยา ปหริ ฯ อมจฺจาปิ สตฺติสหสฺเสน ปหรึสุ ฯ อารกฺขเทวตา ตตฺเถว ชีวิตกฺขยํ ปาปุณิ ฯ ตาวเทว กาลิงฺโค ปราชิตฺวา ปลายิ ฯ ตํ ปลายมานํ ทิสฺวา สหสฺสมตฺตา อมจฺจา