ตตฺถ ยถานุภาวนฺติ ยถาสตฺติ ยถาพลํ ฯ กตญฺญุตนฺติ ตยา มยฺหํ กตํ คุณํ ชานนฺโต ตํ อตฺตนิ วิชฺชมานํ กตญฺญุตํ เปกฺขมาโน ฯ อาคมฺมาติ อาคนฺตฺวา ฯ สตํ สกาเสติ สปฺปุริสานํ สนฺติเก ฯ โมฆาติ โมฆานิ ฯ ปริผนฺทิตานีติ สุขสยนปุจฺฉนวเสน วาจาผนฺทิตานิ สมฺมชฺชนาทิกรเณน กายผนฺทิตานิ จ ตว กถํ อผลานิ ภวิสฺสนฺติ ฯ โย ตินฺทุรุกฺขสฺสาติ โย เอโส ตินฺทุกรุกฺขสฺส ปรโต ปิลกฺขรุกฺโข ฐิโตติ วิมานทฺวาเร ฐิตาว หตฺถํ ปสาเรตฺวา ทสฺเสติ ฯ ปริวาริโตติ อาทีสุ ตสฺส ปิลกฺขรุกฺขสฺส มูเล เอส ตํ รุกฺขมูลํ ปริกฺขิปิตฺวา นิหิตตาย ปริวาริโต ปุพฺเพ ยิฏฺฐยญฺญวเสน ปุริมสามิกานํ อุปฺปนฺนตฺตา ปุพฺพยญฺโญ อเนกนิธิกุมฺภีภาเวน มหนฺตตฺตา อุฬาโร ภูมึ ขณิตฺวา นิหิตตฺตา นิขาโต อิทานิ ทายาทานํ อภาวโต อทายาโท ฯ อิทํ วุตฺตํ โหติ เอส เอตํ รุกฺขมูลํ ปริกฺขิปิตฺวา คีวาย คีวํ ปหรนฺตีนํ นิธิกุมฺภีนํ วเสน มหานิธิ นิขาโต อสฺสามิโก คจฺฉ นํ อุทฺธริตฺวา คณฺหาหีติ ฯ

เอวญฺจปน วตฺวา สา เทวตา พฺราหฺมณ ตฺวํ เอตํ อุทฺธริตฺวา คณฺหนฺโต กิลมิสฺสสิ คจฺฉ ตฺวํ อหเมว ตํ ตว ฆรํ เนตฺวา อสุกสฺมิญฺจ อสุกสฺมิญฺจ ฐาเน นิทหิสฺสามิ ตฺวํ ยาวชีวํ เอตํ ธนํ ปริภุญฺชนฺโต ทานํ เทหิ สีลํ รกฺขาหีติ พฺราหฺมณสฺส โอวาทํ ทตฺวา ตํ ธนํ อตฺตโน อานุภาเวน ตสฺส ฆเร ปติฏฺฐาเปสิ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา พฺราหฺมโณ อานนฺโท อโหสิ รุกฺขเทวตา ปน อหเมวาติ ฯ

ปลาสชาตกํ สตฺตมํ