กลาปุ ราชา สุรามทมตฺโต นาฏกปริวุโต มหนฺเตน ยเสน ราชุยฺยานํ คนฺตฺวา มงฺคลสิลาปฏฺเฏ สยนํ อตฺถราเปตฺวา เอกิสฺสา มนาปาย อิตฺถิยา องฺเก สยติ ฯ คีตวาทิตนจฺเจสุ เฉกา นาฏกิตฺถิโย คีตาทีนิ ปโยชยึสุ ฯ สกฺกสฺส เทวรญฺโญ วิย สมฺปตฺติ อโหสิ ฯ ราชา นิทฺทํ โอกฺกมิ ฯ อถ ตา อิตฺถิโย ยสฺสตฺถาย มยํ คีตาทีนิ ปโยชยาม โส นิทฺทํ อุปคโต กินฺโน คีตาทีหีติ วีณาทีนิ ตุริยานิ ตตฺถ ตตฺเถว ฉฑฺเฑตฺวา อุยฺยานํ ปกฺกนฺตา ปุปฺผผลปลฺลวาทีหิ ปโลภิยมานา อุยฺยาเน อภิรมึสุ ฯ ตทา โพธิสตฺโต ตสฺมึ อุยฺยาเน สุปุปฺผิตสาลมูเล ปพฺพชฺชาสุเขน วีตินาเมนฺโต มตฺตวรวารโณ วิย นิสินฺโน โหติ ฯ อถ ตา อิตฺถิโย อุยฺยานํ ปกฺกนฺตา จรมานา ตํ ทิสฺวา เอถ อยฺโย โน เอกสฺมึ รุกฺขมูเล ปพฺพชิโต นิสินฺโน ยาว ราชา น ปพุชฺฌติ ตาวสฺส สนฺติเก กิญฺจิ สุณมานา นิสีทิสฺสามาติ คนฺตฺวา วนฺทิตฺวา ปริวาเรตฺวา นิสินฺนา อมฺหากํ กเถตพฺพยุตฺตกํ กิญฺจิ กเถถาติ วทึสุ ฯ โพธิสตฺโต ตาสํ ธมฺมํ กเถสิ ฯ อถ สา อิตฺถี องฺคํ จาเลตฺวา ราชานํ ปโพเธสิ ฯ ราชา ปพุทฺโธ ตา อปสฺสนฺโต กหํ คตา วสลิโยติ อาห ฯ เอตา มหาราช คนฺตฺวา เอกํ ตาปสํ ปริวาเรตฺวา นิสีทึสูติ ฯ ราชา กุปิโต ขคฺคํ คเหตฺวา สีสมฺปิ ตสฺส กูฏชฏิลสฺส ฉินฺทิสฺสามีติ เวเคน อคมาสิ ฯ อถ ตา อิตฺถิโย ราชานํ กุทฺธํ อาคจฺฉนฺตํ ทิสฺวา ตาสุ วลฺลภตรา คนฺตฺวา รญฺโญ หตฺถา อสึ คเหตฺวา ราชานํ วูปสเมสุํ ฯ โส อาคนฺตฺวา โพธิสตฺตสฺส สนฺติเก ฐตฺวา กึวาที ตฺวํ สมณาติ ปุจฺฉิ ฯ ขนฺติวาที มหาราชาติ ฯ กา เอสา ขนฺติ นามาติ ฯ อกฺโกสนฺเตสุ ปหรนฺเตสุ ปริภวนฺเตสุ อกุชฺฌนภาโวติ ฯ ราชา ปสฺสิสฺสามิทานิ เต ขนฺติยา อตฺถิภาวนฺติ โจรฆาตกํ ปกฺโกสาเปสิ ฯ โส อตฺตโน จาริตฺเตน ผรสุญฺจ กณฺฏกกสญฺจ อาทาย กาสาวนิวาสโน รตฺตมาลาธโร อาคนฺตฺวา ราชานํ วนฺทิตฺวา กึ กโรมีติ อาห ฯ อิมํ โจรทุฏฺฐตาปสํ คเหตฺวา กฑฺฒิตฺวา ภูมิยํ ปาเตตฺวา กณฺฏกกสํ คเหตฺวา ปุรโต จ ปจฺฉโต จ อุโภสุ ปสฺเสสุ จาติ จตูสุ ปสฺเสสุ เทฺว ปหารสหสฺสานิ เทหีติ ฯ โส ตถา อกาสิ ฯ โพธิสตฺตสฺส ฉวิ ฉิชฺชิ จมฺมํ ฉิชฺชิ มํสํ ฉิชฺชิ โลหิตํ ปคฺฆรติ ฯ ปุน ราชา กึวาที ตฺวนฺติ อาห ฯ ขนฺติวาที มหาราช ตฺวํ ปน มยฺหํ จมฺมนฺตเร ขนฺตีติ มญฺญสิ น มยฺหํ จมฺมนฺตเร ขนฺติ ตยา ปน ทฏฺฐุํ อสกฺกุเณยฺเย หทยพฺภนฺตเร มม ขนฺติ ปติฏฺฐิตา มหาราชาติ ฯ ปุน โจรฆาตโก กึ กโรมีติ ปุจฺฉิ ฯ อิมสฺส กูฏชฏิลสฺส อุโภ หตฺเถ ฉินฺทาติ ฯ โส ผรสุํ คเหตฺวา คณฺฐิกายํ ฐเปตฺวา หตฺเถ ฉินฺทิ ฯ อถ นํ ปาเท ฉินฺทาติ อาห ฯ ปาเทปิ ฉินฺทิ ฯ หตฺถปาทโกฏีหิ ฆฏจฺฉิทฺเทหิ ลาขารโส วิย โลหิตํ ปคฺฆรติ ฯ ปุน ราชา กึวาทีติ ปุจฺฉิ ฯ ขนฺติวาที มหาราช ตฺวํ ปน มยฺหํ หตฺถปาทโกฏีสูติ มญฺญสิ นตฺเถสา เอตฺถ มยฺหํ หิ ขนฺติ คมฺภีรฏฺฐาเน หทยพฺภนฺตเร ปติฏฺฐิตาติ ฯ โส กณฺณนาสมสฺส ฉินฺทาติ อาห ฯ อิตโร กณฺณนาสํ ฉินฺทิ ฯ สกลสรีเร โลหิตํ อโหสิ ฯ ปุน กึวาที ตฺวนฺติ ปุจฺฉิ ฯ มหาราช ขนฺติวาทีติ ฯ มา โข ปน ตฺวํ กณฺณนาสิกโกฏีสุ ปติฏฺฐิตา ขนฺตีติ มญฺญสิ มม ขนฺติ คมฺภีเร หทยพฺภนฺตเร ปติฏฺฐิตาติ ฯ ราชา กูฏชฏิล ตว ขนฺตึ ตฺวเมว อุกฺขิปิตฺวา นิสีทาติ โพธิสตฺตสฺส หทยํ ปาเทน ปหริตฺวา ปกฺกามิ ฯ ตสฺมึ คเต เสนาปติ โพธิสตฺตสฺส สรีรโต โลหิตํ ปุญฺฉิตฺวา หตฺถปาทกณฺณนาสโกฏิโย สาฏกกณฺเณ กตฺวา โพธิสตฺตํ สณิกํ นิสีทาเปตฺวา วนฺทิตฺวา เอกมนฺตํ นิสีทิตฺวา สเจ ภนฺเต ตุมฺเห กุชฺฌิตุกามา ตุมฺเหสุ กตาปราธสฺส รญฺโญ กุชฺเฌยฺยาถ มา อญฺเญสนฺติ ยาจนฺโต ปฐมํ คาถมาห