ตตฺถ ทุชฺชีวิตนฺติ ตีณิ ทุจฺจริตานิ จรนฺโต ทุชฺชีวิตํ

ลามกชีวิตํ ชีวติ นาม ฯ โสปิ ตเทว สนฺธายาห ทุชฺชีวิตมชีวิมฺหาติ ฯ เยสนฺโน น ททามฺหเสติ เย มยํ เทยฺยธมฺเม จ ปฏิคฺคาหเก จ วิชฺชมาเนเยว น ทานํ ททิมฺหา ฯ ทีปํ นากมฺหาติ อตฺตโน ปติฏฺฐํ น กริมฺหา ฯ สพฺพโสติ สพฺพากาเรน ฯ ปริปุณฺณานีติ อนูนานิ อนธิกานิ ฯ ปจฺจมานานนฺติ อมฺหากํ อิมสฺมึ นิรเย ปจฺจมานานํ ฯ นตฺถิ อนฺโตติ อมฺหากํ อสุกกาเล นาม โมกฺโข ภวิสฺสตีติ เอวํ กาลปริจฺเฉโท นตฺถิ ฯ กุโต อนฺโตติ เกน การเณน อนฺโต ปญฺญายิสฺสติ ฯ น อนฺโตติ อนฺตํ ทฏฺฐุกามานมฺปิ โน ทุกฺขสฺส อนฺโต น ปฏิทิสฺสติ ฯ ตทา หิ ปกตนฺติ ตสฺมึ กาเล มาริสา มมญฺจ ตุยฺหญฺจ ปกตํ ปาปํ ปกฏฺฐํ อติพหุเมว กตํ ฯ ตถา หิ ปกตนฺติปิ ปาโฐ ฯ เตน การเณน กตํ เยนสฺส อนฺโต ทฏฺฐุํ น สกฺกาติ อตฺโถ ฯ มาริสาติ มยา สทิสาติ ฯ ปิยาลปนเมตํ ฯ นูนาติ เอกํสฏฺเฐ นิปาโต ฯ โส อหํ อิโต คนฺตฺวา โยนึ มานุสึ ลทฺธา วทญฺญู สีลสมฺปนฺโน หุตฺวา เอกํเสเนว พหุํ กุสลํ กริสฺสามีติ อยเมตฺถ อตฺโถ ฯ

อิติ โพธิสตฺโต เอกเมกํ คาถํ วตฺวา มหาราช โส เนรยิกสตฺโต อิมํ คาถํ ปริปุณฺณํ กตฺวา วตฺตุกาโม อตฺตโน ปาปสฺส มหนฺตตาย ตถา กาตุํ นาสกฺขิ อิติ โส อตฺตโน กมฺมวิปากํ อนุภวนฺโต วิรวิ ตุมฺหากํ เอตสฺส สทฺทสฺส สวนปจฺจยา อนฺตราโย นาม นตฺถิ ตุมฺเห มา ภายิตฺถาติ ราชานํ สญฺญาเปสิ ฯ ราชา มหาชนํ วิสชฺชาเปตฺวา สุวณฺณเภริญฺจาราเปตฺวา ยญฺญาวาฏํ วิทฺธํสาเปสิ ฯ โพธิสตฺโต มหาชนสฺส โสตฺถึ กตฺวา กติปาหํ วสิตฺวา ตตฺเถว คนฺตฺวา อปริหีนชฺฌาโน พฺรหฺมโลเก นิพฺพตฺติ ฯ

สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา ปุโรหิตสฺส มาณโว สารีปุตฺโต อโหสิ ตาปโส ปน อหเมวาติ ฯ