ตตฺถ ทุสฺส เมติ โย เอส มม อวิทูเร เขตฺตปาโล วสติ ทุสฺส อมุสฺสาติ อตฺโถ ฯ อปาภตนฺติ อาภตํ อานีตํ ฯ มํสสูลา จ เทฺว โคธาติ องฺคาเร ปกฺกานิ เทฺว มํสสูลานิ จ เอกา จ โคธา ฯ ทธิวารกนฺติ ทธิวารโก ฯ อิทนฺติ อิทํ เอตฺตกํ มม อตฺถิ เอตํ สพฺพมฺปิ ยถาภิรุจิเตน ปาเกน ปจิตฺวา ปริภุญฺชิตฺวา อุโปสถิโก หุตฺวา รมณีเย รุกฺขมูเล นิสีทิตฺวา สมณธมฺมํ กโรนฺโต อิมสฺมึ วเน วสาติ อตฺโถ ฯ

พฺราหฺมโณ ปเคว ตาว โหตุ ปจฺฉา ชานิสฺสามีติ มกฺกฏสฺส สนฺติกํ คโต เตนาปิ กิมตฺถํ ฐิโตสีติ วุตฺเต ตเถวาห ฯ มกฺกโฏ สาธุ เทมีติ เตน สทฺธึ สลฺลปนฺโต ตติยํ คาถมาห

อมฺพปกฺกุทกํ สีตํ สีตจฺฉายํ มโนรมํ

อิทํ พฺราหฺมณ เม อตฺถิ เอตํ ภุตฺวา วเน วสาติ ฯ